Azıada-2017: Búgin qorjynymyzǵa tek qola medaldar tústi
Sonymen qorjynymyzda 1 altyn, 2 kúmis, 4 qola medalmen tórtinshi oryndy ustap turmyz.
Búgin qazaq eli uıqysynan endi oıanyp jatqanda Kúnshyǵys elinde tramplın sporty boıynsha tuǵyrdan sekirýden Sergeı Tkachenko (238.0 upaı) qola júldeni jeńip aldy. Odan keıin, qazaqstandyq short-trekshi arýlarymyz komandalyq synda taǵy bir qola júldeni jeńip alyp, mereıimizdi tasytsa, kóp kúttirmeı, konkıshi jigitterimiz de estafetalyq jarystan taǵy bir qola medal jeńip aldy.
Sonymen qatar, búgin Hokkeıden Qazaqstan quramasy Ońtústik Koreıa sportshylaryn 4:0 esebimen oısyrata utty. Al konkıden 10000 metrde synǵa túsken jerlesimiz Dmıtrıı Babenko jeńis tuǵyrynan kórinýge bir saty jetpeı qaldy. Ol atalǵan qashyqtyqty tórtinshi orynmen aıaqtady.
Sondaı-aq, búgin kerlıngten Qazaqstannyń erler quramasy sońǵy oıynyn qytaılyq Taıbeı quramasyna qarsy ótkizip, 13:2 esebimen oısyraı utylyp jarysty birjola aıaqtady. Jalpy kerlıngshilerimiz Azıadada bes oıyn ótkizip, bireýinde ǵana katarlyqtarmen ótken oıynda 12:4 esebimen qarsylastaryn utyp, qalǵan tórteýinde jeńilis tapty. Eń alǵashqy jarysta Qytaı quramasymen jolyǵyp, 12:1 esebimen jeńilis tapsa, ekinshi oıynda Ońtústik Koreıaǵa da 12:1 esebimen jeńildi. Al úshinshi oıynda sharshy alań qojaıyndaryna 13:4 esebimen jol berse, búgin qytaılyq Taıbeı quramasynan 13:2 esebimen jeńilis tapty.
Al búgingi jalpy esepte kósh basynda Japonııa sportshylary kele jatyr. Olardyń enshisinde qazirge 12 altyn, 11 kúmis, 7 qola medal bolsa, ekinshi orynda kele jatqan Ońtústik Koreıa eliniń qorjynynda 10 altyn, 11 kúmis, 13 qola medal bar. Úshinshi orynda kele jatqan Qytaıda 6 altyn, 5 kúmis, 5 qola medal bar. Qazaq eli 1 altyn, 2 kúmis, 4 qola medalmen tórtinshi oryndy saqtap tur.