Ájiǵalıev pen Jumaǵazıev short-trekten Reseı kýboginde top jardy

ASTANA. QazAqparat  - Short-trekten Qazaqstan qurama komandasy oqý-jattyǵý jıyny aıasynda Reseı kýboginiń kezeńinde baq synady, dep habarlaıdy QazAqparat tilshisi.

QR Ulttyq Olımpıadalyq komıtetiniń baspasóz qyzmeti málim etkendeı, jarys nátıjesi boıynsha Qazaqstan sportshylary tuǵyr bıiginen kórindi.

Nurbergen Jumaǵazıev 1500 jáne 500 metrde top jaryp, 1000 metrde ekinshi oryndy ıelense, 1000 metrlik saıysta Abzal Ájiǵalıev chempıon atandy. Ádil Ǵalıahmetov úzdik úshtikke endi.

Sondaı-aq, Ǵalıahmetov 500 metrlik básekede kúmis júlde ıelengen bolatyn.

«Biz AQSh-taǵy álem kýbogi kezeńine qatysa almadyq. Sol sebepti, babymyzdy joǵaltpaý úshin Reseı kýboginde baq synaýda jón kórdik. Jalpy, bul jarysty álem kýboginiń úshinshi kezeńine daıyndyq dep aıtsaq bolady. Kalgarıde ótken maýsymnyń alǵashqy jarysynda kúmis júldeger atandym.

Ózimniń oń jambasyma keletin 500 metrlik básekede fınalǵa deıin jetip, júldege ilikkenim qýantady. Sebebi, men úsh birdeı Olımpıada chempıonymen jarystym. Kil myqtylar arasyna syna qaǵyp, medal ıelengenim komandaǵa da jiger beredi», - deıdi Kalgarıde ótken Álem kýbogi kezeńiniń júldegeri Abzal Ájiǵalıev.