Ajar Ǵınııat Medıtsınalyq-sanıtarııalyq alǵashqy kómek sektoryndaǵy problemalardy atady

ASTANA. QazAqparat – Jyl sońyna deıin 12 medıtsınalyq nysan paıdalanýǵa beriledi. Bul týraly búgin Senattaǵy Úkimet saǵatynda Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Memleket basshysynyń tapsyrmasy boıynsha Qazaqstan Respýblıkasynda 2025 jylǵa deıingi «Deni saý ult» árbir azamat úshin sapaly jáne qoljetimdi densaýlyq saqtaý» ulttyq jobasy júzege asyrylýda. Bul joba ótken jyldyń ortasynan keıin qabyldanǵan bolatyn. Ulttyq jobanyń negizgi maqsaty - 2027 jylǵa qaraı ómir súrý uzaqtyǵyn 75 jasqa deıin arttyrý. Qoljetimdi jáne sapaly densaýlyq saqtaýdy qamtamasyz etýdiń kepili - kúshti jáne ózin-ózi qamtamasyz etetin medıtsınalyq-sanıtarııalyq alǵashqy kómek qyzmeti ekeni belgili. Medıtsınalyq-sanıtarııalyq alǵashqy kómek - bul halyqqa barlyq medıtsınalyq kómekti úılestirýge arnalǵan qyzmet», - dedi mınıstr.

Ajar Ǵınııat densaýlyq saqtaýdyń osy sektoryndaǵy negizgi problemalar retinde emhanalardyń azdyǵyn, materıaldyq-tehnıkalyq jaraqtandyrýdyń álsizdigin, ǵımarattardyń qatty tozýy jáne kadrlarmen qamtamasyz etýdiń tómendigin atady.

«Ulttyq jobany iske asyrý aıasynda biz medıtsınalyq-sanıtarııalyq alǵashqy kómektiń qoljetimdiligin barynsha mobıldilik pen halyqtyń keń aýqymyna qoljetimdilik jaǵyna qaraı jaqsartý jónindegi is-sharalar josparyn bekitip, sol boıynsha jumys istep jatyrmyz tik jáne iske asyryp jatyrmyz. Qazirgi ýaqytta elde 5 myńnan astam medıtsınalyq-sanıtarııalyq alǵashqy kómek uıym bar. Byltyr qosymsha 30 medıtsınalyq nysan paıdalanýǵa berildi. Bıyl 92 nysan ashamyz dep josparlap otyrmyz. Onyń 80-i ashyldy», - dedi ol.