Ajar Ǵınııat medıtsına mamandaryn kásibı merekesimen quttyqtady
«Medıtsınada jumys isteýdiń basty sharttarynyń biri - adamdarǵa degen súıispenshilik. Sondyqtan medıtsınada kezdeısoq adamdar joq. Biz ómirdiń qıyn jáne kúrdeli sátterinde kómekke kelip, úlken jaýapkershilikti óz moınymyzǵa alamyz. Bul ásirese sońǵy 2 jyldaǵy pandemııada aıqyn kórindi. Bul ýaqyt búkil planeta úshin qıyn boldy, Qazaqstan da budan tys qalǵan joq. Tutas elimiz bul synaqtarǵa tótep berdi, al jaýapkershiliktiń negizgi bóligi aldyńǵy qatarda turǵan medıtsına qyzmetkerlerine júkteldi. Pandemııa kezinde aýrýhanalarda koronovırýs ınfektsııasy bar 500 myń naýqas, reanımatsııada 50 myńǵa jýyq aýyr naýqas emdeldi jáne olardy 30 myńnan astam medıtsına qyzmetkeri emdedi», - dep atap ótti mınıstr elordada ótken «Deni saý ult» medıtsınalyq sammıtinde.
Ajar Ǵınııat bir jyl ishinde Qazaqstannyń medıtsına qyzmetkerleri statsıonarlarda 3 mıllıonnan astam adamdy, onyń ishinde 640 myńnan astam balany emdegenin atap ótti. Jalpy sany 630 myń operatsııa, onyń ishinde 20 myńǵa jýyǵy joǵary tehnologııalar kómegimen jasalǵan.
Aýrýhanalarda ońaltý boıynsha, onyń ishinde aýrý balalarǵa 160 myńnan astam qyzmet kórsetildi, ambýlatorlyq deńgeıde 110 mıllıon adam júgnigen. Jedel medıtsınalyq járdem brıgadalary 8 mıllıonnan astam shaqyrýǵa barǵan, bul táýligine 22 myńǵa jýyq shuǵyl jaǵdaı degen sóz.
«Akýsherler 450 myńǵa jýyq áıeldi bosandyrdy, bul – Táýelsiz Qazaqstan tarıhyndaǵy eń joǵary kórsetkish. Bul naǵyz bala býmy boldy! Eń bastysy, biz barlyq qıyndyqtarǵa qaramastan, medıtsına salasyn jaqsartý úshin bar kúsh-jigerimizdi salýymyz kerek», - dedi mınıstr.
Sóz sońynda A. Ǵınııat qazaqstandyq medıtsına qyzmetkerleri, dárigerler, medbıkeler, feldsherler, sanıtarlar ózderiniń kúndelikti qajyrly eńbekterimen ult densaýlyǵyn jaqsartýǵa, árbir naýqasty tıimdi qoljetimdi medıtsınalyq kómekpen qamtamasyz etýge óz úlesterin qosatynyna senim bildirdi.
«Qurmetti áriptester, sizderge alǵysymdy bildiremin! Kásibı merekelerińiz qutty bolsyn! Densaýlyq, baqyt jáne jaqsy kóńil-kúı tileımin! Elimizdiń densaýlyq saqtaý salasynda 78 myńnan astam dáriger, 180 myńnan astam orta medıtsınalyq personal mamandary jáne 10 myńnan astam basqa da kómekshi, biraq sala úshin mańyzdy medıtsınalyq uıymdardyń qyzmetkerleri jumys isteıdi», - deıdi Densaýlyq saqtaý mınıstri.
Aıta keteıik, sammıt aıasynda densaýlyq saqtaý salasynyń eń úzdik ókilderi marapattaldy, olardyń arasynda dárigerler, medbıkeler, sala menedjerleri bar. Densaýlyq saqtaý salasyndaǵy kóp jylǵy jemisti eńbegi jáne salanyń damýyna qosqan úlesi úshin «Eńbek ardageri» medalimen – 253, «Densaýlyq saqtaý isiniń úzdigi» tósbelgisimen – 565, «Densaýlyq saqtaý isine qosqan úlesi úshin» tósbelgisimen – 569 medıtsına qyzmetkeri marapattaldy.
Sonymen qatar, azamattardyń densaýlyǵyn saqtaý isine qosqan jeke úlesi jáne minsiz adal eńbegi úshin QR Densaýlyq saqtaý mınıstriniń Qurmet gramotasymen 574 medıtsına qyzmetkeri, QR Densaýlyq saqtaý mınıstriniń alǵysymen – 428 medıtsına qyzmetkeri marapattalǵan.
Buǵan deıin Qazaqstannyń úzdik medıtsınalyq uıymdaryna ALTYN SHIPAGER músinshesi saltanatty túrde tabystalǵan edi.