Ajar Ǵınııat medıtsına qyzmetkerlerine qatysty qozǵalǵan qylmystyq ister týraly aıtty

ASTANA. QazAqparat – Jyl saıyn medıtsına qyzmetkerlerine qatysty 300-ge jýyq is qozǵalady. Bul týraly Májiliste keıbir zańnamalyq aktilerge densaýlyq saqtaý máseleleri boıynsha ózgerister engizý týraly zań jobasyn tanystyrý kezinde Densaýlyq saqtaý mınıstri Ajar Ǵınııat aıtty, dep habarlaıdy QazAqparat.

«Zań jobasyn ázirleý úshin keıingi 3-4 jylda jeke jáne zańdy tulǵalardan kelip túsken jáne qaralǵan ótinishterge taldaý júrgizildi. Osy oraıda atalǵan merzimde 14 myńnan astam ótinish kelip túsken edi. Bul turǵyda medıtsına qyzmetkerlerine qatysty qozǵalǵan qylmystyq isterge taldaý júrgizildi. Jyl saıyn medıtsına qyzmetkerlerine qatysty kásibı mindetterin tıisinshe oryndamaǵany úshin QR Qylmystyq kodeksiniń 317-baby boıynsha shamamen 300-ge jýyq is qozǵalady», - dedi A. Ǵınııat Májiliste «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde.

Onyń aıtýynsha, qylmystyq ister kóbinese ólim qaýpi joǵary medıtsınalyq salalarda jıi qozǵalady. ıAǵnı akýsher-gınekologtar, hırýrg mamandar, travmatologtar, anestezıologtar isti bolyp jatady.

«Osyndaı jaǵdaı bolǵan kezde, medıtsına qyzmetkeri jalaqysynyń deńgeıi qazirgi kezde naýqastyń densaýlyǵyna keltirilgen zııandy óz betinshe óteýge múmkindik bermeıdi. Keı jaǵdaıda osyndaı oqıǵalar kezinde dárigerler týystarynan qarajat jınap, ótemaqy tólep jatady», - dedi vedomstvo basshysy.

Budan buryn habarlanǵandaı, elimizde dárigerdiń kásiptik jaýapkershiligine qatysty mindetti saqtandyrý júıesi engizilmek.