Ajar Ǵınııat: Dárigerlerdiń jalaqysy jyl saıyn artyp otyrady

NUR-SULTAN. QazAqparat - Shortandy aýdandyq aýrýhanasynda Densaýlyq saqtaý mınıstri Ajar Ǵınııat medıtsına qyzmetkerleri ujymymen kezdesý ótkizip, onda densaýlyq saqtaýdyń kútiletin jańalyqtary týraly aıtty, dep habarlaıdy QazAqparat QR Densaýlyq saqtaý mınıstrliginiń bapasóz qyzmetine silteme jasap.

«Meniń kelýimniń maqsaty - tekserý emes, tikeleı dıalog qurý, máselelerińizdi talqylaý, patsıentterdi tyńdaý. Kabınette otyryp qana, durys sheshim qabyldaı almaımyn, óıtkeni aýyldyq densaýlyq saqtaýdyń barlyq máseleleriniń tereńdigin sizderden artyq eshkim bilmeıdi», - dep atap ótti A.Ǵınııat aýrýhana ujymyna.

Mınıstr aýyl dárigerlerine koronavırýspen turaqty kúreskenderi úshin shyn júrekten alǵysyn bildirdi. Sondaı-aq, onyń aıtýynsha, dárigerlerdiń eńsesi túspegen, qaıta olar daǵdarysqa qarsy turýdy úırendi.

Ol búgingi sapar barysynda kelgen úsh dárigerlik ambýlatorııanyń tamasha kadrlyq quramyn erekshe atap ótti.

«Meniń oıymsha, mundaı dárigerler bar patsıentterdiń joly bolǵysh. Olar óz isine shyn berilgen, áıtse de osyndaı kadrlardy baǵalap, olarǵa bar jaǵdaıdy jasaý kerek, áıtpese olar elordaǵa ketýi múmkin», - dedi mınıstr Shortandy aýdanynyń ákimine.

Vedomstvo basshysy óz tarapynan medıtsına qyzmetkerlerin qoldaý úshin barlyq kúsh-jigerdi jumsaıtynyn aıtyp, eńbekaqyny arttyrý jyl saıyn júrgiziletinin eske saldy.

Sonymen qatar, A.Ǵınııat Densaýlyq saqtaý júıesindegi basqa da jańalyqtar týraly aıtyp berdi.

Osylaısha, jaqyn arada medıtsına qyzmetkerleriniń kásibı jaýapkershiligin saqtandyrý týraly zań jobasy usynylatyn bolady. Ol medıtsına qyzmetkerlerin qylmystyq qýdalaýdan qorǵaýdy, «dárigerler sottarda júrýdiń ornyna negizgi qyzmetpen aınalysa alatyndaı» jazanyń basqa túrlerin jeńildetýdi qarastyrady.

A.Ǵınııat árbir medıtsınalyq uıym úshin tarıf qurylymyna engiziletin saqtandyrý tólemderiniń mehanızmi týraly aıtyp berdi.

«Sondaı-aq, medıtsına qyzmetkerleriniń sanatyna qatysty ózgerister kútilýde, olar biliktilik deńgeıine aýystyrylady. Sol 4 deńgeı ári qaraı qala beredi, tek belgili bir krıterııler boıynsha óziniń sáıkestigin dáleldeý qajet bolady», - dep habarlady mınıstr.

Kezdesý sońynda mekeme basshysy jergilikti bılik ókilderinen aýyl dárigerlerin materıaldyq qoldaý, tehnıkalyq jabdyqtaý, eskirgen dárigerlik ambýlatorııa ǵımaratyn jedel jóndeý nemese aýystyrý máselelerin sheshýdi surady.

Sondaı-aq, ol «100 kún - 100 suraq» jobasy aıasynda dárigerler men turǵyndardyń ótinishteri negizinde taldaý júrgizilip jatqan densaýlyq saqtaýdyń barlyq ózekti problemalary boıynsha ashyq tikeleı dıalogqa daıyndyǵyn bildirdi.