Ajar Ǵınııat aýdıtorlyq tekseris kezinde tabylǵan kemshilikterge pikir bildirdi

NUR-SULTAN. QazAqparat - Densaýlyq saqtaý júıesi úshin ártúrli mamandyqtaǵy 20 myńnan astam dáriger, 4,5 myńnan astam bakalavr, magıstrant, doktorant daıarlanǵan. Bul jaıynda Esep komıtetiniń densaýlyq saqtaý salasyndaǵy aýdıtorlyq tekserisine arnalǵan jıynda Densaýlyq saqtaý mınıstri Ajar Ǵınııat málim etti, dep habarlaıdy QazAqparat.

Densaýlyq saqtaý mınıstrligi basshysynyń aıtýynsha, sońǵy kezeńde 29 myńnan astam dáriger men meıirbıke biliktiligin arttyrdy.

Budan basqa, 2019-2021 jyldar kezeńinde mınıstrliktiń sheshimi boıynsha medıtsınalyq joǵary oqý oryndary stýdentteriniń stıpendııasy ulǵaıtyldy.

10 jyl ishinde alǵash ret memlekettik grantty ulǵaıtý qaıta qaraldy.

Bul sharalar elimizde medıtsınalyq bilim berýdi damytýǵa yqpal etkenin A.Ǵınııat atap ótti.

Vedomstvonyń málimetinshe, medıtsınalyq ǵylym salasynda úsh jyl ishinde osy bıýdjettik baǵdarlamalardy iske asyrý sheńberinde medıtsınalyq ǵylym uıymdary men medıtsınalyq joǵary oqý oryndarynyń patenttik belsendiliginiń 15% ósýi baıqalady.

Sońǵy úsh jylda dıagnostıka, emdeý jáne medıtsınalyq ońaltýdyń 63 ınnovatsııalyq tehnologııasyn qoldaný maquldandy.

Jyl saıyn ındeksteletin sheteldik basylymdarda jarııalanatyn maqalalar sanynyń 46% - ǵa óskeni baıqalady.

Bul rette joǵary reıtıngti jýrnaldardaǵy jarııalanym úlesi 25-ten 50% deıin ósti.

Mınıstr qazaqstandyq medıtsınalyq joǵary oqý oryndarynyń ýnıversıtetterdiń bedeldi jahandyq reıtıngine enýin qamtamasyz etýge múmkindik bergen ǵylymı jáne ınnovatsııalyq qyzmettiń básekege qabiletiniń búkil negizgi kórsetkishteriniń ósýin atap ótti.

Mysaly, S. Asfendııarov atyndaǵy Qazaq ulttyq medıtsına ýnıversıteti Eýropa men Ortalyq Azııanyń damýshy elderiniń QS reıtınginiń TOP-200 qataryna kirip, 146-shy oryndy ıelendi.

Aıta keter jaıt, koronavırýstyq ınfektsııa pandemııasymen kúrestiń qıyn kúnderinde bizdiń joǵary oqý oryndarymyzdyń oqytýshylar quramy, ınternder, rezıdentter praktıkalyq densaýlyq saqtaý dárigerlerimen ıyq tiresip, adam ómirin saqtap qalýǵa úles qosty, sondaı-aq sol kezeńde osy baǵdarlamalardy iske asyrý jalǵasyn tapty.

«Bul rette aýdıtorlyq esepte belgilengen eskertýlerdiń bir bóligi aýdıtorlardyń jumysy kezeńinde joıyldy. Sonymen qatar, mınıstrlik jumysqa qabyldaǵan belgili bir eskertýler men kemshilikter bar. Biz osy salanyń jumysyn odan ári damytý úshin densaýlyq saqtaý júıesine sapaly taldaý júrgizýge árqashan daıynbyz», - dep qorytyndylady vedomstvo basshysy.