Ajar Ǵınııat Atyraý oblysyndaǵy medıtsına mamandarynyń tapshylyǵyn túsindirdi

NUR-SULTAN. QazAqparat –QR Densaýlyq saqtaý mınıstri Ajar Ǵınııat Atyraý oblysynyń Óńirlik kommýnıkatsııalar qyzmetinde ótken baspasóz máslıhatynda aımaqtaǵy medıtsına mamandarynyń tapshylyǵyna túsinik berdi, dep habarlaıdy QazAqparat tilshisi.

«Halyq únine qulaq asatyn memleket» jobasynyń aıasynda mınıstrlik janynan úlken joba júrip jatyr. Osy 2 aıdyń ishinde 1000-nan astam suraq kelip tústi. Onyń ishinde Atyraý oblysynan da keldi. Eń kóp kóterilgen másele bala men ana densaýlyǵyna baılanysty boldy. Sondyqtan da búgingi jumys josparynyń basty baǵyty osy máselege arnalyp otyr. 5 kún ishinde osy jerde respýblıkalyq komıssııa jumys istedi. Barlyq jaǵdaılar jan-jaqty tekserildi», - dedi Ajar Ǵınııat.

Mınıstrdiń pikirinshe, kadrlar máselesi sapaly medıtsınalyq kómekti qamtamasyz etý úshin negizgi ról atqarady.

«Atyraý oblysynyń densaýlyq saqtaý salasynda 8 myńnan astam medıtsına qyzmetkeri, sonyń ishinde 2 myńnan astam dáriger, 6 myńnan astam orta medıtsına qyzmetkerleri jumys isteıdi. Oblys boıynsha dáriger tapshylyǵy – 201 shtat. 2020 jyly joǵary oqý oryndarynan 70-ten astam dáriger, 2021 jyly 65 dáriger kelse, bıyl 52 dáriger kelýi kózdelip otyr. ıAǵnı, búgingi tapshylyqty osy túlekterdiń esebinen jabýǵa bolatyn edi. Biraq kóptegen dárigerler, jumys istep júrgen jergilikti dárigerlerdiń kóbi jeke medıtsınaǵa ketip jatyr eken. Bul bir jaǵynan qarajatqa baılanysty. Ekinshi jaǵynan sońǵy jyldary densaýlyq saqtaý salasynda bolǵan kóptegen jaǵdaılarǵa baılanysty jaýapkershiliktiń tym joǵary bolýynan jeke klınıkalarǵa ketip jatqany taǵy bar», - dedi mınıstr.