ÁZERTADJ agenttiginiń qurylǵanyna 100 jyl toldy
Ázerbaıjannyń ÁZERTADJ memlekettik aqparat agenttigi – respýblıkadaǵy jetekshi aqparat resýrsy, jergilikti jáne sheteldik BAQ úshin eldegi jalǵyz resmı aqparat kózi.
ÁZERTADJ agenttigi 1920 jyly 1 naýryzda Ázerbaıjan demokratııalyq respýblıkasy úkimetiniń bastamasymen qurylǵan. Keńes bıligi tusynda onyń ataýy birneshe ret ózgerdi.
Ázerbaıjan memlekettik táýelsizdigin alǵannan keıin agenttik óziniń tarıhı ataýyn qaıtaryp aldy. 1995 jyly 3 naýryzda ol Mınıstrler kabıneti janyndaǵy Memlekettik telegraf agenttigi degen ataýǵa ıe boldy. Al 2000 jyldyń 17 qańtarynan bastap Ázerbaıjan memlekettik telegraf agenttigi dep atalady.
ÁZERTADJ resmı habarlarmen birge saıasat, ekonomıka, ǵylym, bilim, densaýlyq saqtaý, sport, qorshaǵan orta jáne basqa da túrli taqyryptar aıasynda jedel ári senimdi aqparat taratady. Jańalyqtar aǵylshyn, orys, frantsýz, nemis, arab, qytaı jáne ıspan tilderinde jaryq kóredi. Agenttik foto jáne mátin habarlarmen birge eldiń áleýmettik, saıası, ekonomıkalyq jáne sporttaǵy ómiri týraly vıdeojańalyqtardy da kórermen nazaryna usynady. Mýltımedıa jáne vıdeojańalyqtar qyzmeti «Ázerbaıjanǵa saıahat», «Bizdiń eskertkishter», «Álem qalalary» sekildi jobalardy daıyndaıdy. ÁZERTADJ-dyń vıdeosaıtymen qosa, balalarǵa arnalǵan bilim portaly da jumys istep tur.
Búginde agenttik 50-ge jýyq sheteldik aqparat resýrstarymen kelisim jasasqan, onyń ishinde qazaqstandyq «QazAqparat» halyqaralyq aqparat agenttigi de bar. Odan bólek, ÁZERTADJ jýrnalısteri álemniń túkpir-túkpirinen habar taratady (21 tilshiler qosyny bar).
Ótken jyly ÁZERTADJ mobıldi aqparat resýrstaryna júginý kórsetkishi - 50 paıyzǵa, al vıdeojańalyqtar qaralymy - 75 paıyz ósken.
2004 jyly Azııa jáne Tynyq muhıty elderi aqparat agenttikteriniń uıymyna (OANA) múshe boldy. 2008 jyldan beri ÁZERTADJ – «AsiaPulse» Azııa jańalyqtar agenttikteri konsortsıýmynyń múshesi.
«QazAqparat» HAA ujymy ÁZERTADJ agenttigin ǵasyrlyq mereıtoıymen shyn júrekten quttyqtap, eńbekte zor tabys tileıdi.