Ázerbaıjannyń Shýsha qalasy Túrki memleketteriniń mádenı astanasy atandy
Býrsa qalasynda Halyqaralyq Túrki mádenıeti men murasy qorynyń qoldaýymen «Býrsa – túrki áleminiń mádenı astanasy 2022» jylynyń resmı jabylý rásimi ótti, oǵan «Shýsha kúnderi» eki kúndik qoǵamdyq-oıyn-saýyq baǵdarlamasy da kirdi.
Sharaǵa Halyqaralyq Túrki mádenıeti men murasy qorynyń prezıdenti Gúneı Efendıeva, TÚRKSOI Bas dırektory Sultan Raev, Túrki memleketteri uıymynyń bas dırektory Kýbanychbek Ómiralıev, sondaı-aq baýyrlas túrki memleketteri atynan ókildik etetin dıplomattar, jergilikti ákimdik basshylary, memlekettik organdar men BAQ ókilderi qatysty.
«Búkil álemdegi túrki halyqtarynyń ǵasyrlar boıǵy qundylyqtaryn zertteıtin, qorǵaıtyn jáne nasıhattaıtyn Túrki mádenıeti men murasy halyqaralyq qory Býrsada «Shýsha kúnderin» ótkizý bastamasyn kóterdi jáne bul usynysty túrki elderiniń memleket basshylary qoldap, Samarqandtaǵy Túrki memleketteri uıymynyń IX sammıti aıasynda qabyldandy, bul onyń deklaratsııasynda da kórinis tapty», - dep atap ótti Gúneı Efendıeva.
Osylaısha, «Shýsha kúnderi» aıasynda Býrsa turǵyndary men qonaqtary «Shýshanyń biregeı marjany» kórkem-derekti fılminiń premerasyna, «Meniń júregim Shýshada qaldy» spektakliniń qoıylymyna, álemge áıgili fotograf Reza Degatıdiń fotokórmesine, sondaı-aq Ázerbaıjan Ulttyq kıim ortalyǵynyń jetekshisi sánger-dızaıner Gúlnara Halılovanyń «Qarabaq» kollektsııasynyń kórsetilimine bardy.
«Yeddi gözəl» jobasy da kelýshilerdiń nazaryn aýdardy, onyń negizgi ıdeıasy – ortaq túrki tamyry men baı tarıhı murasy bar (Ázerbaıjan, Qazaqstan, Qyrǵyzstan, Túrkııa, Ózbekstan, Túrikmenstan jáne Majarstan) jeti eldiń mýzykanttarynan turatyn septet (jeti oryndaýshydan turatyn mýzykalyq ansambl) qurý. Ujym quramynda Qazaqstan atynan halyqaralyq konkýrstardyń laýreaty jáne Astana qalasy Memlekettik akademııalyq fılarmonııasynyń solısi Maııa Medetbek qatysty.
Uıymdastyrýshylar atap ótkendeı, bul shara túrki áleminiń baı tarıhı jáne mádenı murasyn nasıhattaýǵa jáne baýyrlas elderdi ulttyq jáne rýhanı qundylyqtar negizinde jaqyndastyrýǵa yqpal etedi. Oǵan qosa, qatysýshylar Ázerbaıjannyń kórnekti tulǵalarynyń otany jáne baı murasynyń besigi – Shýsha qalasynyń aldaǵy jyly túrki memleketteriniń mádenı astanasy dep jarııalanýy tarıhtaǵy jańa jáne orasan zor beles ekenin atap ótti.
Serikbol Qoshmaǵambetov