Ázerbaıjannyń Ortalyq ǵylymı kitaphanasynda «Qazaq ádebıeti aptalyǵy» ótýde
QR Syrtqy ister mınıstrliginen málim etkendeı, Qazaqstan men Ázerbaıjan arasyndaǵy mádenıet jáne ǵylym salasyndaǵy uzaq merzimdi yntymaqtastyq baǵdarlamasyn júzege asyrý sheńberinde Qazaqstan Elshisi Serjan Ábdikárimov Ázerbaıjannyń Ulttyq ǵylym akademııasynyń Ortalyq ǵylymı kitaphanasynda bolyp, onyń dırektory Mamed Alıevpen kezdesý ótkizdi.
Atalmysh kitaphanada 7-14 sáýir aralyǵynda «Qazaq ádebıeti aptalyǵy» ótýde.
M.Alıev bul joba eki memlekettiń ekijaqty mádenı jáne ǵylymı yntymaqtastyǵyn nyǵaıtýǵa eleýli úles qosatynyn jetkizdi.
S.Ábdikárimov eki el jastarynyń ıgiligi úshin bilim berý, kitap almasý jáne ǵylymı zertteýler salasyndaǵy baılanystardy keńeıtýdiń mańyzdylyǵyn atap ótti.
«Kezdesý qorytyndysy boıynsha taraptar kitaphana isindegi ǵylymı-aqparattyq yntymaqtastyqty jandandyrýǵa, Qazaqstan men Ázerbaıjannyń ǵylymı kitaphanalary men mekemeleri arasyndaǵy tıisti kelisimderge qol qoıýǵa kelisti», - dedi SІM-nen.