Ázerbaıjannyń eki qalasyna zymyranmen shabýyl jasaldy

BAKÝ. QazAqparat – 16 qazannan 17-ne qaraǵan túni, 01.00 shamasynda Ázerbaıjannyń Gıandja jáne Mıngıachevır qalalaryna raketamen shabýyl jasaldy, dep habarlaıdy QazAqparattyń menshikti tilshisi.

Saldarynan Gıandjede 12 adam mert bolyp, 40-tan astam turǵyn jaraqat aldy. Ondaǵan úı qıratyldy. Boljam boıynsha shabýyl SKAD (R-17) ballıstıkalyq zymyrandarymen jasalǵan.

ÁR prezıdentiniń kómekshisi – Prezıdent ákimshiliginiń syrtqy saıasat bóliminiń jetekshisi H. Gadjıevtiń málimdeýinshe, Gıandjege zymyrandar Armenııadan jiberilgen.

Al Armenııanyń qarýly kúshteri bul shabýylǵa qatysymyz joq dep otyr. Armenııa Qorǵanys mınıstrliginiń baspasóz hatshysy Sh.Stepanıan Armenııa aýmaǵynan nemese Armenııa qarýly kúshteri tarapynan Ázerbaıjanǵa oq jaýdyrylǵan joq dep jazdy.

Aıta keteıik, Taýly Qarabaq oqıǵasy 27 qyrkúıekte qaıta shıelenisip ketti. Aýqymy keń áskerı qaqtyǵys júrip jatyr. Ázerbaıjan men Armenııada soǵys jaǵdaıy jarııalandy.

Reseı tarapynyń bastamasymen Máskeýde ótken keńes nátıjesinde Baký men Erevan tutqyndar men qaza tapqandardyń denesimen almasý úshin gýmanıtarlyq maqsatta 10 qazanda jergilikti ýaqyt boıynsha 12.00-den bastap atysty toqtatý týraly kelisken bolatyn.