Ázerbaıjannyń Qazaqstan ekonomıkasyna salǵan ınvestıtsııasy 211 mln dollardan asty

<p>BAKÝ. KAZINFORM &ndash; Ázerbaıjan Qazaqstan ekonomıkasyna 211,4 mln dollar ınvestıtsııa quıdy. Al Qazaqstannyń Ázerbaıjan ekonomıkasyna salǵan kapıtal kólemi 114 mln dollar bolǵan.</p>

Ázerbaıjannyń Energetıka mınıstri Pıarvız Shahbazov pen Qazaqstannyń Kólik mınıstri Marat Qarabaev Ázerbaıjan men Qazaqstan arasyndaǵy saýda-ekonomıkalyq yntymaqtastyq jónindegi birlesken úkimetaralyq komıssııanyń 20-shy otyrysynda Ázerbaıjan arqyly ótetin túrli baǵyt boıynsha qazaqstandyq munaıdyń tranzıtin ulǵaıtý máselesin talqylady. Sondaı-aq, Ortalyq Azııadan Eýropaǵa «jasyl energııa» eksporty úshin dáliz qurý jaǵy qaraldy.

«Ótken jyly Qazaqstan men Ázerbaıjan arasyndaǵy júk tasymalynyń kólemi 1,5 ese, 4,3 mln tonnaǵa deıin ulǵaıdy. Bul rette, orta dáliz boıynsha júk tasymaldaý kólemi 65%-ǵa nemese 2,8 mln tonnaǵa deıin artty. Ótken jyly eki el arasyndaǵy taýar aınalymynyń kólemi 314 mln dollar boldy. Búginde Ázerbaıjannyń Qazaqstanǵa jınaqtalǵan ınvestıtsııalary 211,4 mln dollarǵa, al Qazaqstannyń Ázirbaıjan ekonomıkasyna quıǵan kapıtal kólemi 114 mln dollarǵa jetti», - dedi Marat Qarabaev.

Kezdesýde Ázerbaıjan-Qazaqstan ınvestıtsııalyq qoryn qurý, ónerkásiptik parkterde birlesken óndiristi uıymdastyrý, «Alıat» portynda astyq termınalyn salý, keme jasaý salasyndaǵy yntymaqtastyq, sondaı-aq qazaqstandyq kompanııalardyń okkýpatsııadan bosatylǵan aýmaqtarda iske asyrylatyn jobalarǵa qatysý múmkindikteri talqylandy.

Sonymen qatar taraptar munaı-gaz salasyndaǵy yntymaqtastyqty keńeıtý, ártúrli baǵyt boıynsha qazaqstandyq munaı tranzıtiniń kólemin ulǵaıtý jáne orta dáliz boıynsha júk tasymaldaý máselelerin talqylady.

Komıssııanyń 21-shi otyrysy kelesi jyly Bakýde ótedi.