Ázerbaıjanyń memlekettik qaýipsizdik qyzmeti teraktynyń aldyn aldy

<p>ASTANA. KAZINFORM &ndash; Ázerbaıjandaǵy shabýyldardy josparlaǵan adam qamaýǵa alyndy. Memlekettik qaýipsizdik qyzmeti júrgizgen tergeý barysynda Reseı Federatsııasynyń Mýrmansk qalasynda turatyn Ázerbaıjan Respýblıkasynyń azamaty Askerov Bahrýz Alımamed oglý (1988 jyly týǵan) qolǵa tústi.</p>

Bul týraly Ázerbaıjannyń azertag.az memlekettik aqparat agenttigi habarlady.

Askerov Bahrýz Alımamed oglý eldegi qoǵamdyq qaýipsizdikti buzý, halyq arasynda dúrbeleń týǵyzý jáne oǵan yqpal etý maqsatynda basqa adamdarmen baılanysqa tústi degen kúdikke alyndy. Kúdiktiniń kóptegen adam ólýi tıis terrorıstik akt jasaýǵa nıettengeni de aıtylýda.

Bahrýz Askerov jasyryn túrde respýblıkanyń ártúrli aımaqtarynda turatyn adamdardy baılanysqa tartyp, Lıankaran qalalyq atqarýshy bıliginiń basshysyna qastandyq jasaý maqsatynda olarǵa nusqaýlar bergeni anyqtaldy.

Sondaı-aq, Bahrýz Askerov onymen baılanysta bolǵan adamdarǵa Ázerbaıjannyń keıbir aýdandarynda aǵylshyn tili muǵalimi bolyp jumys isteıtin shetel azamatyna qarsy qastandyq jasaýdy tapsyrǵany anyqtalyp otyr.

Júrgizilgen keshendi jedel-tergeý is-sharalarynyń nátıjesinde Bahrýz Askerov Ázerbaıjan Respýblıkasy Qylmystyq kodeksiniń 28, 214.2.1 (terrorızmge daıyndyq) baptary boıynsha ustalyp, qylmystyq jaýapkershilikke tartyldy, oǵan qatysty sot sheshimimen qamaýǵa alý túrindegi bultartpaý sharasy qoldandy.