Ázerbaıjanǵa reseılik Sputnik V vaktsınasy jetkizildi

BAKÝ. ÁZERTADJ - QazAqparat – Búgin Reseıden Ázerbaıjanǵa koronavırýsqa qarsy Sputnik V vaktsınasynyń birinshi partııasy jetkizildi, dep habarlaıdy QazAqparat ÁZERTADJ aqparat agenttigine silteme jasap.

40 myń doza vaktsına tıelgen ushaq Geıdar Alıev atyndaǵy halyqaralyq áýejaıyna qondy.

Ushaqty áýejaıda Ázerbaıjan Syrty ister mınıstriniń orynbasary Halaf Halafov, osy eldegi Reseı Elshisi Mıhaıl Bocharnıkov, Densaýlyq saqtaý mınıstriniń orynbasary Vıktor Gasymov jáne basqa da resmı tulǵalar qarsy aldy.

Aıta keteıik, jaqynda Ázerbaıjanǵa koronavırýsqa qarsy taǵy 5 mln vaktsına jetkizý josparlanyp otyrǵandyǵy habarlanǵan edi.

Ázerbaıjanda vaktsınalaý 18 qańtarda bastaldy. Ázerbaıjan – túrli óndiristegi vaktsınalardy alýǵa múmkindik beretin Dúnıejúzilik densaýlyq saqtaý uıymynyń COVAX baǵdarlamasynyń múshesi. Elde 1 shildege deıin ózgeshe karantındik rejım ornatylǵan.