Ázerbaıjandyqtar Naýryz merekesin toılaýdy bastap ketti

BAKÝ. QazAqparat – Búgin Ázerbaıjanda «Sý seısenbisi» meıramy toılanyp jatyr. Jergilikti halyq úshin bul Naýryzǵa daıyndyqtyń basy bolyp esepteledi, dep habarlaıdy QazAqparattyń menshikti tilshisi.

«Sý chershenbesı» meıramyn qazaq tiline tikeleı aýdarsa, «sý seısenbisi» degen maǵyna beredi. Keıbir derekti onyń túpki maǵynasy «bastapqy seısenbi» nemese «seısenbilerdiń basy» degenge saıady. Eski nanym boıynsha «sý seısenbisi» kúninde sýǵa táý etý kerek bolǵan. Bul kúni Kún uıasynan shyqqan sátte alynǵan sý «jańa sý» bolyp eseptelgen. Ol sý myńnan bir dertke daýa bolatyn qasıetke ıe degen senim bolǵan.

Dástúr boıynsha bul kúni dastarhanda mindetti túrde sý turýy shart. Ol sý ústel ústine tógilse, jaqsylyqtyń nyshany dep yrymdaǵan. Demek, bul jylda molshylyq bolady dep sengen. Biraq bul kúni aǵyndy sýdy keship ótken adamnyń joly bolmaıdy degen nanym bolǵan. «Sý seısenbisinde» alaý jaǵý arqyly kótemniń alǵashqy lebin qarsy alý dástúri bolǵan.

«Sý seısenbisi» dep aty aıtyp turǵandaı, bul meıramda turǵyndar aryqtardy arshyp, bulaqtardyń kózin ashqan, toǵandardyń mańaıyn tazalaǵan. Bul sharýanyń bári án-dýmanmen, sýmen baılanysty joralǵylarmen kómkerilip otyrǵan.

Naýryzdyń joralǵylarynyń tórt negizgi nyshany Ot, Sý, Jer, Aýa desek, ázerbaıjan halqy osy tórt nyshanǵa arnap tórt seısenbini merekeleıdi – «Sý seısenbisi», «Ot seısenbisi, «Topyraq seısenbisi, «Aýa seısenbisi».

Bıyl ázerbaıjandyqtar «Ot seısenbisin» 28 aqpanda, «Jer seısenbisin» 7 naýryzda, «Topyraq sensenbisin» 14 naýryzda toılaıdy. Al Naýryz merekesi 20-24 naýryz aralyǵynda ótedi.

Ázerbaıjanda Naýryz baıramy táýelsizdik alǵan kezden bastap memlekettik meıram retinde toılana bastady. Al 2010 jyldyń 23 aqpanynda BUU Bas Assambleıasynyń rezolıýtsııasy boıynsha 21 naýryz Halyqaralayq Naýryz kúni bolyp belgilendi.

Avtory: Serıkbol Koshmaganbetov

Foto: Azertadj