Ázerbaıjandyq sarapshy: Kezekten tys prezıdenttik saılaý - ýaqyt talaby

NUR-SULTAN. QazAqparat - QR Prezıdenti Qasym-Jomart Toqaevtyń halqyna kezekten tys prezıdenttik saılaý ótkizý jónindegi mańyzdy habarlamamen úndeý arnaýy óte oryndy. Sebebi Qazaqstan búginde belsendi qozǵalys ústinde. Mundaı pikirdi ázerbaıjandyq saıasattanýshy Tofık Abbasov bildirdi, dep habarlaıdy QazAqparat tilshisi.

«Q.Toqaev jarııa etken kezekten tys prezıdenttik saılaý ótkizý týraly sheshim jalpy halyqtyń Qazaqstanda qaryshty ınnovatsııalyq damýǵa arnalǵan baǵdardyń jalǵasatyndyǵyna senimin nyǵaıtýǵa baǵyttalǵan ári talap etilgen qadam ekendigi shyndyq. Buǵan qosa, Toqaevtyń ózi de eldegi júzege asyrylyp jatqan jobalar, sonymen qatar bolashaqpen baılanysty máseleler ózektiligi men kúshin saqtaıtyndyǵyn túsinýge múmkindik bere otyryp, bul jaıynda aıtty da», - dedi sheteldik sarapshy.

Onyń atap ótýinshe, Q.Toqaev úndeýinde eske salǵan qoǵamdyq-saıası kelisim barlyq ýaqytta da Qazaqstan úshin strategııalyq mánge ıe bolyp keldi jáne bola da beredi.

«Jalpy, ol barlyq ýaqytta kez kelgen memleket úshin nómiri birinshi mindet sanalady. Oǵan qol jetkizý jolynda sátsizdikter bolmaýy úshin tabandy ári jan-jaqty saralanǵan baǵdarlamalyq is-qımyl qajet. Qazaqstannyń jańa Prezıdentine Nursultan Nazarbaev sııaqty passıonarly, tabysty jáne kórnekti basshy bolýǵa týra keledi. Elbasynyń jolyn jalǵastyrýshy saýatty basqarýshynyń laıyqty izbasary bolýǵa tyrysýǵa májbúr bolady. Bul úshin jańa Prezıdentke kreatıvti, qyzyqty jańa ıdeıalar men bastamalar qajet. Al bul eldegi júzege asyrylyp jatqan reformalarǵa tyń serpin berýge kómektesedi. Standarttan tys jobalardyń kómegimen ǵana alǵa qaraı tabysty ilgerileýge bolady», - dedi Tofık Abbasov.