Ázerbaıjandyq delegatsııa Senat depýtattaryn saılaý úderisine óz baǵasyn berdi

ASTANA. QazAqparat - Senat depýtattaryn saılaý barysynda qaýipsizdik pen tártip saqtaýdy qamtamasyz etý boıynsha barlyq sharalar qabyldady. Bul týraly búgin Ázerbaıjan Ortalyq saılaý komıssııasy tóraǵasynyń orynbasary Natık Mamedov málim etti.

«Búgin biz Astanadaǵy saılaý úderisin baıqap otyrdyq. Senat depýtattyǵyna saılaý Qazaqstan halqy úshin úlken mańyzǵa ıe, sebebi, búgin saılanǵan depýtattar el múddesi úshin qyzmet etetin bolady. Atap aıtqanda, biz ashyq ári demokratııalyq jolmen ótken úderistiń kýágeri boldyq», - dedi ol.

Onyń sózine qaraǵanda, búgin Astanadaǵy M.Ótemisuly atyndaǵy oqýshylar saraıynda elorda atynan shyqqan kandıdattardy saılaý barysynda daýys berý nátıjesine áser etetindeı eshqandaı zań buzýshylyqtar baıqalǵan joq. «Osy oraıda men búgingi ádil saılaýmen Qazaqstan halqyn quttyqtaǵym keledi», - dedi ol.

Aıta keteıik, Senat depýtattaryn saılaý janama saılaý quqyǵy negizinde jasyryn daýys berý arqyly júzege asady. Janama saılaý quqyǵy - Parlament Senaty depýtattarynyń saılaýynda daýys berýge tek qana tańdaýshylar, ıaǵnı máslıhattar depýtattary ǵana qatysady degendi bildiredi. Osylaısha, óz kezeginde elimizdiń azamattary tikeleı saılaýda saılaǵan máslıhattar depýtattary senatorlardy saılaıdy, al olar Parlamentte óńir jurtshylyǵynyń múddelerin bildiredi.