Ázerbaıjandyq dáriger COVID-19-ǵa qarsy ekpeden keıingi keńestermen bólisti

BAKÝ. QazAqparat – Immýnızatsııadan keıin qandaı erejerlerdi ustanyp, densaýlyqty qalaı qorǵaý kerektigi týraly keńestermen Ázerbaıjannyń Ortalyq kedendik gospıtali jedel jáne shuǵyl medıtsınalyq kómek dárigeri Beılıar Imanov bólisti, dep habarlaıdy QazAqparat tilshisi.

«COVID-19-ǵa qarsy ekpe egilgennen keıin aldyn alý sharalaryn saqtaý kerek, atap aıtqanda, buqaralyq is-sharalarǵa barmaı, gıgıena talaptaryn oryndap, medıtsınalyq maska taǵyp júrý qajet», - deıdi dáriger.

Imanov ekpe salynǵannan keıingi alǵashqy úsh kún sý protsedýralarynan bas tartqan jón degen pikirde. Sonymen qosa denege fızıkalyq turǵyda salmaq túsirmeý, alkogoldi sýsyndardan mindetti túrde bas tartý kerek.

«Vaktsınatsııadan keıin tamaqtanýǵa mán bergen durys. D vıtamıniniń jetispeýshiligin boldyrmaı, aqýyzy kóp et, balyq jáne jumyrtqa ónimderin jeý kerek», - deıdi dáriger.

Al Ázirbaıjannyń Densaýlyq saqtaý mınıstrliginiń bas ınfektsıonısti Teıar Eıvazov ınfektsııaǵa álsiz qarsylyq jasaıtyn aǵzanyń vaktsınatsııa jasalǵanyna qaramaı, koronavırýs juqtyrý qaýpi bar ekenin aıtty.

«Bundaı adamdarǵa vaktsınatsııa júz paıyz áser etpeıdi. Eger aǵzadaǵy antıdeneler az bolsa, qaıtadan vaktsınatsııa jasaý kerek», - dep sanaıdy Teıar Eıvazov.

Eske sala keteıik, búgin Ázerbaıjanda 1 mln 200 myń turǵyn vaktsınatsııa alǵan. Bul eldegi árbir onynshy adam koronavırýstan qorǵalǵan degendi bildiredi. Taǵy 285 myń adam koronavırýspen aýyryp, ınfektsııadan tabıǵı túrde qorǵalǵan. Soǵan qaramastan juqtyryp jatqandar sany azaıar emes, kúnine 2 myńnan asa koronavırýs juqtyrǵandar, 30-dan asa adamnyń qaıtys bolǵany tirkelip jatyr.

Avtor: S. Koshmaǵanbetov