Ázerbaıjandaǵy anar merekesi qalaı ótedi

BAKÝ. QazAqparat - Ázerbaıjandyqtar granat sııaqty paıdaly jemisti erekshe baǵalaıdy. Bul jemis eldiń sımvolyna aınalǵan. Búginde Ázerbaıjanda tipti osy jemiske arnalǵan mereke de bar, ol bıyl 11-shi ret atalyp ótýde.

Qalyptasqan dástúr boıynsha qazan aıynyń sońy men qarasha aıynyń basynda anar óndirý ortalyǵy sanalatyn Ázerbaıjannyń Geokchaı aýdanynda osy jemis túriniń jıyn-teriminiń aıaqtalý qurmetine oraı anar festıvali uıymdastyrylady. Aıta keteıik, munda granat jemisiniń barlyq túrleri óndiriledi. QazAqparat tilshisine merekeniń qalaı atalyp ótetinin óz kózimen kórýdiń sáti tústi.

Festıvalǵa ádette anar ósiretin sharýashylyǵy bar azamattar qatysady jáne olar merekege ózderiniń ónimderin alyp kelip, halyqqa usynady.


Anar túrli kólemde bolady. Olardyń eń úlkenderiniń salmaǵy 1,5 kelige jetedi. Sýrette salmaǵy 1100 gramm tartatyn jemis.

Festıvalda qalyń kópshilikke jemisi julynbaǵan anar aǵashtary da kórsetildi.


Merekege qatysatyn ujym músheleri anardyń dánderinen tý, eltańba, karta sııaqty rámizderdi jáne ózge de kóptegen dúnıelerdi beıneleıdi.

Merekede anar shyryny men ózge de jemisterdi daıyndaýdyń dástúrli ádisi kórsetildi.

Jyl saıyn anar baqshalarynda ondaǵan myń tonna jemis jınalady da olardyń birazy shet memleketterge jóneltiledi. Qalaı degenmen til úıiretin eń dámdi, eń balǵyn anardy jáne olardan daıyndalatyn taǵamdardy tek osy merekede ǵana kezdestirýge bolady.

Anardy tek taǵam retinde ǵana emes, emdik maqsatta da paıdalanady. Mysaly, anar talynyń tamyryn aýrýdy basý úshin qoldansa, shyrynyn qan qysymyn turaqtandyrý úshin paıdalanady, al jemistiń jumsaǵyn tábetti arttyrý úshin tutynýǵa bolady.

Merekege óte úlken mańyz beriledi. Óıtkeni oǵan tek ázerbaıjandyqtar ǵana emes, shet memleketterden týrıster de jınalady. Festıvalǵa joǵary dárejeli memlekettik qyzmetkerler men dıplomatııalyq korpýs ókilderi jáne kórshiles memleketterdiń azamattary da keledi.

Ázerbaıjandyqtar anardy «jemistiń sultany» dep ataıdy.