Ázerbaıjanda úkimet basshysy aýysty

BAKÝ. QazAqparat – Ázerbaıjanda úkimet basshysy aýysty. Búgin plenarlyq otyrysta Ázerbaıjannyń Mıllı májilisi (parlamenti) jańa premer-mınıstrdiń kandıdatýrasyn maquldady, dep habarlaıdy QazAqparat tilshisi.

El Úkimetin Ázerbaıjan Prezıdentiniń ekonomıkalyq máseleler jónindegi kómekshisi Álı Asadov basqaratyn boldy.

Eske sala keteıik, Novrýz Mamedov Ázerbaıjannyń premer-mınıstri laýazymyn 2018 jylǵy sáýir aıynan 2019 jylǵy qazan aıyna deıin atqarǵan edi.

Álı Idaıat oǵly Asadov 1956 jylǵy 30 qarashada Nahchyvan qalasynda dúnıege kelgen. 1974 jyly Bakýdegi №134 mektepti, al 1978 jyly Máskeý halyq sharýashylyǵy ınstıtýtyn támamdaǵan.

Eńbek jolyn 1978 jyly Ázerbaıjan KSR Memlekettik josparynyń sáıkes baǵyty boıynsha Azerbaıjan KSR Ǵylym Akademııasy ekonomıka ınstıtýtynyń bas laboranty retinde bastaǵan.

1980-89 jyldary Ázerbaıjan KSR Ǵylym Akademııasynyń ekonomıka ınstıtýtynda bas laborant, kishi ǵylymı qyzmetker, ǵylymı qyzmetker, 1989-1995 jyldary Baký áleýmettik basqarý jáne saıasattaný ınstıtýtynda dotsent jáne kafedra meńgerýshisi bolyp qyzmet atqarǵan.

1995-2000 jyldar aralyǵynda Ázerbaıjan Mıllı májilisiniń depýtaty bolǵan.

Ázerbaıjan Respýblıkasy Prezıdentiniń 1998 jylǵy 17 sáýirdegi Ókimine sáıkes Ázerbaıjan Respýblıkasy Prezıdentiniń ekonomıkalyq máseleler jónindegi kómekshisi, 2012 jylǵy 29 qarashadaǵy Ókimge sáıkes Ázerbaıjan Respýblıkasy Prezıdent Ákimshiligi basshysynyń orynbasary bolyp taǵaıyndalǵan.

Avtor: Bekbaý Taımanov