Ázerbaıjanda prezıdent Ilham Álıevti ulyqtaý rásimi ótti

<p>BAKÝ. KAZINFORM &ndash; 14 aqpan kúni Mıllı Medjlıste (Parlamentte) kezekten tys prezıdenttik saılaýda jeńiske jetken Ázerbaıjan Respýblıkasynyń Prezıdenti Ilham Álıevti ulyqtaý rásimi ótti.</p>

Prezıdent Ilham Álıev Ázerbaıjan Respýblıkasynyń Konstıtýtsııasyna qolyn qoıyp, ant berdi: «Ázerbaıjan Respýblıkasy Prezıdentiniń ókilettikterin júzege asyra otyryp, Ázebaıjan Respýblıkasynyń Konstıtýtsııasyn saqtaýǵa, memleket táýelsizdigi men aýmaqtyq tutastyǵyn qorǵaýǵa, halqyna abyroımen qyzmet etýge ant etemin».

Ilham Álıev sondaı-aq Quranqa qol qoıyp ant berdi. Odan keıin Prezıdent ınaýgýratsııa rásiminde sóz sóılep, besinshi merzimge memleket basshysy qyzmetine kiristi.

Ilham Álıev sondaı-aq Ázerbaıjan Mınıstrler kabıneti músheleriniń ókilettikterin oryndaý týraly qaýlyǵa qol qoıdy. Úkimettiń jańa quramy qurylǵanǵa deıin Mınıstrler Kabınetiniń ókilettikterin júzege asyrý onyń burynǵy quramyna júkteledi.

Eske sala ketsek, Ázerbaıjan Konstıtýtsııasynyń 116-babyna sáıkes (Ázerbaıjan Respýblıkasy Mınıstrler Kabınetiniń otstavkasy) jańadan saılanǵan Ázerbaıjan Respýblıkasynyń Prezıdenti qyzmetine kirisip, óz ókilettikterin júzege asyrýǵa kirisken kúni Ázerbaıjan Respýblıkasynyń Mınıstrler Kabıneti otstavkaǵa shyǵady.

Ázerbaıjanda kezekten tys prezıdent saılaýy 7 aqpanda ótti.

Jaqynda Ázerbaıjannyń Ortalyq saılaý komıssııasy respýblıkada ótken prezıdent saılaýynyń qorytyndysyn shyǵardy, oǵan sáıkes Ilham Álıev memleket basshysy bolyp qaıta saılandy.