Ázerbaıjanda polıtsııa azamattardyń kovıd pasportyn teksere bastaıdy

BAKÝ. QazAqparat – Ázerbaıjanda 1 qyrkúıekten bastap koronavırýs indetine baılanysty jańa shekteý engiziledi. Bul týraly 20 tamyz kúni Mınıstrler kabınetiniń janyndaǵy Jedel shtabtyń brıfıngisinde Ázerbaıjan prezıdentiniń kómekshisi Shahmar Movsýmov málim etti, dep habarlaıdy QazAqparattyń menshikti tilshisi.

Onyń aıtýynsha, Ázerbaıjanda birqatar shekteý engiziledi, alaıda eldegi karantın rejımi kúsheıtilmeıdi.

«Qoǵamdy koronavırýs juqtyrýdyń kóbeıýi alańdatyp otyr. Ázirge lokdaýn men qatań shekteý engizýdi qajet dep tappadyq. Vaktsınalaýdyń paıdasy belgili, ol ǵylymı zertteýlermen dáleldengen. Osy protsesti jalǵastyrý kerek. Eger jaǵdaı jaqsarmasa, kelesi joly sharalardy kúsheıtýdi qarastyratyn bolamyz», - dedi ol.

Sh. Movsýtovtyń aıtýynsha, demalys kúnderi qoǵamdyq kóliktiń jumysyn toqtatý azamattardyń belsendiligi men olardyń bir-birimen baılanysyn azaıtý úshin jasalǵan.

«Ázirge demalys kúnderi qoǵamdyq kóliktiń jumysyn qaıta jandandyrý talqylanbaıdy. Qyrkúıektiń ortasynda, mektepter men ýnıversıtetter ashylar aldynda ony qaıta talqylaýǵa salýǵa bolady, alaıda ázirge bul týraly aıtýǵa erte», - dep málimdedi Sh. Movsýmov.

Brıfıng barysynda Ázerbaıjannyń ІІM baspasóz qyzmetiniń bastyǵy Elshad Gadjıev 1 qyrkúıekten bastap polıtsııa qyzmetkerleriniń QR kod nemese tólqujat derekteri boıynsha azamattardyń kovıd pasportyn, sonymen qatar jalpy kommertsııalyq nysandarda karantın talaptarynyń saqtalýyn tekseretinin málimdedi.

«Saýda ortalyqtarynda jáne bilim berý mekemelerinde COVID pasportsyz júrgen jeke tulǵalarǵa 200-400 manat (117-235 dollar), al laýazymdy adamdarǵa 4-5 myń manat (2352-2941 dollar) somasynda aıyppul salynady», - dedi ІІM ókili.

Jedel shtab 1 qyrkúıekten bastap JOO stýdentterine, meımanhana turǵyndaryna, iri saýda-oıyn saýyq ortalyqtaryna kelýshiler men qoǵamdyq tamaqtandyrý oryndarynyń klıentterine kovıd pasportynyń kerek ekenin eske saldy.

Avtory Serikbol Qoshmaǵanbetov