Ázerbaıjanda oq-dáriler qoımasyndaǵy órt aýyzdyqtalyp, adamdar úılerine oraldy

ASTANA. QazAqparat - Ázerbaıjan Qorǵanys mınıstrliginiń oq-dáriler qoımasynda tutanǵan órttiń saldaryn joıýǵa el Prezıdenti Ilham Álıevtiń tapsyrmasyna sáıkes jumyldyrylǵan qurylymdardyń keshendi shuǵyl sharalarynyń nátıjesinde, saǵat 17.00-ge qaraı órttiń órshýi aýyzdyqtalyp, úlken aýmaqtaǵy jarylystarǵa jol berilmedi. Bul týraly Ázerbaıjannyń qorǵanys jáne tótenshe jaǵdaılar mınıstrlikteriniń jáne bas prokýratýranyń birlesken málimdemesinde aıtyldy, dep habarlaıdy QazAqparat trend.az saıtyna silteme jasap.

Qazirgi ýaqytta jumyldyrylǵan ınjenerlik-saperlik bólimsheler, sondaı-aq órt qyzmetiniń adamdary men tehnıkalyq kúshteri, Ázirbaıjan aýmaǵyn Mınasyzdandyrý jónindegi ulttyq agenttiktiń azamattyq qorǵanys áskeri jarylys saldarynan jan-jaqqa ushqan synyqtar men jarylmaı qalǵan oq-dárilerdi izdep-tabý boıynsha tıisti is-sharalardy jalǵastyrýda.

Onymen bir mezgilde,  oqıǵa saldarynan jeńil dene jaraqattaryn alǵan áskerı qyzmetshiler bolyp tabylmaıtyn 5 adam  Shyńjań aımaqtyq emdeý-dıagnostıkalyq ortalyǵyna jetkizildi. Olar alǵashqy medıtsınalyq kómek kórsetilgennen keıin úılerine qaıtaryldy.  Taǵy bir adam aýrýhanada dárigerlerdiń baqylaýynda jatyr. Onyń densaýlyq jaǵdaıy turaqty, ómirine esh qaýip joq. Tótenshe jaǵdaıdan aýyr jaraqat alǵandar men qaza bolǵandar joq.

Odan bólek, Baký-Gýba tasjolynda qozǵalys qalpyna keltirildi.

Qaýipsiz jerge kóshirilgen jaqyn mańdaǵy aýyldardyń turǵyndary úılerine oraldy.