Ázerbaıjanda mına basyp ketken aýyl turǵyny aıaǵynan aıyryldy

BAKÝ. QazAqparat – Ázerbaıjannyń Geranboı aýdanynyń turǵyny Tapgaragoıýnlý aýylynyń mańaıynda jaıaý áskerge qarsy qoıylatyn mınany basyp, jaraqat aldy, dep habarlaıdy QazAqparattyń menshikti tilshisi.

Geranboı aýdanynyń prokýratýrasy aýdan turǵynynyń mınadan zardap shekkeni týraly aqparat taratty. Vedomstvonyń habarlaýynsha, 1996 jyly týǵan aýly turǵyny Mamedov Výgar Magsýdoglý aýyl sharýashylyǵymen aınalysý kezinde mına basqan.

Oqıǵa Ázerbaıjannyń Geranboı aýdany Tapgaragoıýnlý aýylynyń aýmaǵynda tirkeldi. Ol aýrýhanaǵa jetkizilip, oqıǵa saldarynan aıaǵy kesip alyndy.

Prokýratýra qyzmetkerleri oqıǵa ornyna tekseris júrgizdi, sot-medıtsınalyq saraptama taǵaıyndaldy, atalǵan fakti boıynsha tergeý júrip jatyr.

Eske sala keteıik, 20 qarasha kúni 1972 jyly týǵan Shahın Garaev dál osy aýmaqta aýyl sharýashylyǵymen aınalysý kezinde mına basyp, túrli dárejede jaraqat alǵan.

17 qańtar kúni Ázerbaıjan Respýblıkasynyń Mınadan tazartý jónindegi agenttigi (ANAMA) azamattarǵa mına qaýpi týraly habarlaǵan bolatyn.

Agenttik ereje saqtap, turǵyndardy mına jasyrylǵan jerlerge shyqpaýǵa shaqyrdy.

Illıýstratsııalyq foto: news.day.az