Ázerbaıjanda kúnnen qorǵaıtyn kózildirikti dáriger nusqaýynsyz satýǵa tyıym salynýy múmkin
Osy másele Mıllı Medjlıstiń (parlament) densaýlyq saqtaý jónindegi komıteti ázirlegen «Optıka týraly» zań jobasynyń alǵashqy nusqasynda kóterilgen, deıdi komıtet tóraǵasynyń orynbasary Musa Gýlıev. «Biz bul jobany tıisti mınıstrlikter men uıymdarǵa jiberemiz jáne olardyń usynystary men qorytyndylaryn eskeremiz. Bul másele kúzgi sessııada komıtettiń kún tártibine engiziledi. Sonan soń, múmkin, zań jobasyn parlamenttiń jalpy otyrysynda talqylaýǵa usynatyn shyǵarmyz», - dedi Gýlıev.
Depýtattyń sózine sensek, mundaı zańdar kóptegen memleketterde bar. «Ázerbaıjanda da bul salada zańdylyq kúsheıtilýi tıis. Óıtkeni, másele tek kúnnen qorǵaıtyn kózildirikterde ǵana emes, sonymen qatar adam densaýlyǵy úshin mańyzdy optıkalyq kózildirikterdi de durys tańdaý qajet. Jazda kúnnen qorǵaıtyn kózáınekti derlik barlyq adam taǵady, biraq ózi tańdaǵan kózildiriktiń oǵan saı kele me, densaýlyǵyna zııany joq pa, ony jurttyń bári bile bermeıdi. Sondyqtan máseleni quqyqtyq retteý turǵysynan alǵanda mundaı zańnyń mańyzy zor», - dedi depýtat.
Onyń sózine qaraǵanda, optıkalyq jáne kúnnen qorǵaıtyn kózildirikti dárigermen keńesken soń satyp alý kerek. «Kúnnen qorǵaıtyn kózildirikterdi kez kelgen adam kez kelgen jerde satýyna jol berýge bolmaıdy. Kim óndirgeni belgisiz kózildirikterdi satýǵa da tyıym salý kerek. Munyń bári jańa zań jobasynda kórinis tapqan. Kózildirikti ımporttaý, satý qyzmetteri jáne onymen aınalysatyn tulǵalar tıisti kýrstardan ótýi, kem degende, sertıfıkat alýy tıis», - deıdi Gýlıev.