Ázerbaıjanda Qazaqstannan keletin týrıster sany eki ese artqan

BAKÝ. QazAqparat – Bıyl 11 aıdyń ishinde 2,5 myń qazaqstandyq Ázerbaıjan eline saıahattap barǵan. Bul kórsetkish ótken jylmen salystyrǵanda 1,5 ese artyq, dep habarlaıdy QazAqparat tilshisi Ázirbaıjannyń týrızm týraly memlekettik agenttigine silteme jasap.

Osylaısha elimiz Ázerbaıjanǵa saıahattaıtyn týrısterdiń sany boıynsha 15 eldiń ishinde 10 orynǵa turaqtap otyr.

Bıyl 11 aıda atalǵan elge 135,370 otandasymyz barǵan. Atalǵan kórsetkish ótken jylmen salystyrǵanda 54 %-ǵa artyq.

Statıstıkaǵa sáıkes, Ázerbaıjanǵa týrıster jıi saıahattaıtyn TOP-15 eldiń reıtıngisinde Qazaqstannyń úlesi 2 %. Birinshi orynda 27,4%-ben Reseı tur. Odan ári Túrkııa jáne Iran jaıǵasqan. Olardyń úlesi 19,4% jáne 10,8 % quraıdy.

Ázerbaıjannyń memlekettik statıstıka komıtetiniń málimetinshe, bıyl qańtar-qazan aılary aralyǵynda atalǵan elge 1,3 mln adam bardy. Ótken jylǵa qaraǵanda 2,2 ese artyq.

Aıta keteıik, Ázerbaıjan bıyl Parsy shyǵanaǵy elderiniń turǵyndary úshin týrıstik qyzyǵýshylyq týdyrdy. Bul aımaqtan týrıster aǵyny 2,7 ese artyp, ótken jylmen salystyrǵanda 307,5 myń adamǵa jetti.

Sonymen qatar, TMD elderinen týrıstik aǵyn 2 ese (462,9 myń adamǵa deıin), al Eýroodaqqa múshe elderden baratyn týrıster 2,3 ese (62,6 myń adamǵa deıin) ósken.

Týrıstik aǵynnyń artýyna qaramastan, Ázirbaıjannyń aldynda pandemııaǵa deıingi deńgeıge oralý mindeti tur. Aqparatta aıtylǵandaı, atalǵan elde agro jáne ekotýrızm, sondaı-aq óńirlerde ornalasqan kreatıvti ındýstrııa salasynda úlken áleýet bar.

Foto: www.avianews.com