Ázerbaıjanda karantın sharalary kúsheıtiledi

BAKÝ. QazAqparat - Ázerbaıjanda Covid-19 vırýsyn juqtyrǵan azamattar sanynyń kúrt ósýine jáne sanıtarlyq-epıdemıologııalyq jaǵdaıdyń nasharlaýyna baılanysty birqatar shekteý engizdi, dep habarlaıdy QazAqparattyń Ázerbaıjandaǵy tilshisi.

Operatıvtik shtabtyń habarlaýynsha, 19 qazan saǵat 00.00-den 2 qarasha saǵat 06.00-ge deıin Baký metropolıteniniń qyzmeti toqtatylady.

Kórsetilgen merzimde eldiń barlyq bilim berý mekemesinde kanıkýl jarııalandy.

Qyzmetkerlerdi qashyqtan basqarý rejımine kóshirý arqyly memlekettik qyzmetkerlerdiń jumysqa shyǵýy 30% - ǵa deıin qysqarady.

Osyndaı talaptar men erejeler jeke sektorda jáne basqa salalarda jumys isteıtin mekemeler men uıymdarǵa usynylady.

Joǵary táýekel tobyna kiretin 65 jastan asqan adamdarǵa qajettiliksiz úıden shyqpaýǵa keńes beriledi.

Sondaı-aq, qabyldanǵan sharalar aıasynda jedel shtab azamattardy jeke gıgıena erejelerin, sondaı-aq medıtsınalyq-profılaktıkalyq erejelerdi qatań saqtaýǵa, qorǵanys maskalaryn qoldanýǵa, qajet bolǵan jaǵdaıda úıden shyǵýǵa, qoǵamdyq oryndarda beıtanys adamdarmen az baılanysta bolýǵa, qoldanystaǵy karantındik jaǵdaılardy saqtaýǵa shaqyrady.