Ázerbaıjanda karantın rejımi jeńildetildi
Ázerbaıjandaǵy epıdemıologııalyq jaǵdaıdyń jaqsarýyna baılanysty Jedel shtab 6 naýryzdan bastap karantındik rejımdi jumsartý týraly sheshim qabyldady. Osylaısha toı, aza tutý jáne dinı is-sharalardy ótkizýge shekteýler alynyp tastaldy, qoǵamdyq tamaqtaný oryndaryna, mádenıet pen kınoteatrlarǵa kelýshilerdi shekteýsiz qabyldaýǵa ruqsat etildi. Atap aıtqanda, memlekettik organdarda azamattardy toptyq jáne jeke negizde qabyldaýǵa ruqsat etiledi; dinı ǵuryptyq qyzmetterdi, sondaı-aq aza tutý rásimderin saltanatty zaldarda jáne basqa da jabyq úı-jaılarda uıymdastyrý jáne ótkizý. Jurtshylyqtyń qatysýymen ótetin barlyq buqaralyq is-sharalarǵa qoıylǵan shekteý alynyp tastaldy. Tamaqtandyrý obektilerinde kalıan jabdyqtaryn paıdalanýǵa ruqsat etiledi.
Sondaı-aq, jolaýshylardy kútip alý jáne shyǵaryp salý úshin áýejaı termınaldaryna kirý tártibi qalpyna keltirilýde. Mádenıet nysandaryna, kınoteatrlarǵa, teatrlar men májilis zaldaryna, demalys jáne oıyn-saýyq oryndaryna, balalardyń oıyn-saýyq ortalyqtaryna kirýge ýaqyt pen adam sanyna qoıylatyn shekteýler joıyldy. Qoǵamdyq tamaqtandyrý nysandarynyń tún ortasynan keıin jumys isteýine salynǵan tyıym, bir ústelde bir ýaqytta alty adamnan aspaýǵa qatysty shekteýler de alynyp tastaldy.
Bul rette betperde rejımi 1 mamyrǵa deıin úı ishinde saqtalady, adamdar kóp jınalatyn oryndarǵa – saýda ortalyqtaryna, oıyn-saýyq oryndaryna, iri qoǵamdyq tamaqtaný oryndaryna, úılený toılaryna, dinı hramdarǵa jáne t.b. kirýge tek vaktsınatsııany rastaıtyn COVID pasporttarymen (eki dozada) ruqsat etiledi.
Degenmen júk kólikterin qospaǵanda, eldiń qurlyqtaǵy shekaralary jabyq kúıinde qalyp otyr. Jalpy, pandemııa bastalǵaly Ázerbaıjanda koronavırýs ınfektsııasynyń 789 332 jaǵdaıy anyqtalyp, 775 275 adam jazyldy, 9 518 naýqas qaıtys boldy. Barlyq kezeńde COVID-ǵa 6 599 806 test tapsyryldy.