Ázerbaıjanda erekshe karantın jazǵa deıin sozylatyn boldy

BAKÝ. QazAqparat – Ázerbaıjan úkimeti búgin Jedel shtabtyń brıfıngi barysynda respýblıka aımaǵynda erekshe karantın rejımin jazǵa deıin sozý týraly qaýly qabyldanǵanyn málim etti, dep habarlaıdy «QazAqparat» HAA menshikti tilshisi.

Brıfıng barysynda málim bolǵanyndaı, elde COVID-19 koronavırýs ınfektsııasynyń taraýynyń aldyn alý úshin Ázerbaıjan aýmaǵynda erekshe karantın rejımi 2021 jyldyń 1 maýsymy, saǵat 1-ge deıin jalǵasady.

Úkimettiń bul sheshimi birinshi kezekte qoǵamdyq kólikke qatysy bolyp otyr. Onyń jumysy el aýmaǵynda Naýryz merekesine, naqtyraq aıtqanda 20-29 naýryz aralyǵynda jáne maýsym aıynyń 1-ne deıin jeksenbi kúnderi toqtatylady.

Atalǵandarmen qosa toılar men týǵan kúnder sııaqty buqaralyq jıyndardy ókizýge tyıym salynady. Baký metropolıteniniń jumysy da toqtap turady.

Brıfıng barysynda metro qyzmetiniń jandanýy karantın rejımi kezekti ret jeńildetilgennen keıin kún tártibine qoıylatyny aıtyldy.

Aıta keteıik, sońǵy kúnderi Ázerbaıjanda koronavırýs juqtyrý jaǵdaılary kóbeıip otyr. Vırýs juqtyrǵan naýqastar sany ásirese Bakýde kóp. Bul qalada barlyq naýqastardyń 52,9% júr. Budan ári ınfektsııa juqtyrǵandar sany jaǵynan Absheron aýdany men Sýmgaıyt qalasy jáne Gıandja-Gazah óńiri tur.

Osyǵan deıin Ázerbaıjanda koronavırýstyń brıtandyq shtamy tabylǵan bolatyn.

Bılik ókilderiniń málim etýinshe, atalǵan shtamnyń juqtyrǵysh qasıeti zor bolǵanymen Ázerbaıjanda qoldanylyp jatqan vaktsına koronavırýstyń barlyq shtamdaryna birdeı tıimdi.

Serikbol Qoshmaǵambetov