Ázerbaıjanda eki mıllıardynshy tonna munaı óndirildi
Bakýde elde eki mıllıard tonna munaı óndirilýine arnalǵan saltanatty rásim ótti. Geıdar Álıev ortalyǵynda bolǵan sharaǵa Ázerbaıjan prezıdenti Ilham Álıev, SOCAR jáne VR ókilderi, munaı ónerkásibiniń qyzmetkerleri qatysty.
Ázerbaıjan prezıdenti elde alǵash ret 1846 jyldan bastap munaı óndirile bastaǵanyn aıtyp, ázerbaıjan halqyn munaıdyń eki mıllıardynshy tonnasynyń óndirilýimen quttyqtady. «Ázerbaıjan «qara altyndy» adam kapıtalyna aınaldyra bildi. Biz munaıdan alǵan tabysymyzdy tıimdi paıdalanyp keldik, muny búgingi tańda álemdik qoǵamdastyq ta moıyndap otyr. Kóptegen elderde baı munaı ken oryndary bola tura, halqy kedeıshilikte ómir súrýde. Al Ázerbaıjanda munaı - halyqty berekege keneltip, damýdyń, turaqtylyqtyń, qýattyń qaınar kózine aınalyp otyr. Búginde munaı-gaz salasy Ázerbaıjannyń egemen el bolýynda, eldiń ekonomıkalyq áleýetin qalyptastyrýda zor mańyzǵa ıe, muny barsha jurt bilýi tıis», - dedi Álıev.
Ázerbaıjan prezıdentiniń sózine qaraǵanda, eldegi anyqtalǵan munaı qory 1,5 mıllıard tonnaǵa jetedi, taǵy da eki mıllıard tonnaǵa jýyq munaı bar dep boljam jasalǵan.
«Ázerbaıjandaǵy tabıǵı gaz qory jaıly aıtar bolsaq, 2,6 trıllıon tekshe metr kóleminde tabıǵı gaz qory anyqtalǵan, taǵy úsh-tórt trıllıon tekshe metr gazǵa boljam jasalyp otyr. «Azerı-Chyrag-Gıýneshlı» ken orny kem degende 2050 jylǵa deıin jumysyn jalǵastyrady. «Shah Denız» ken orny kem degende 100 jylǵa deıin qyzmet etedi», - dedi Álıev.