Ázerbaıjanda eki adam mınaǵa túsip qaldy

BAKÝ. QazAqparat - Ázerbaıjannyń Terter aýdanynda eki adam mınaǵa jarylyp, zardap shekti, dep habarlaıdy QazAqparat Ulttyq mınadan tazartý agenttigine (ANAMA) silteme jasap.

Jol qyzmetiniń qyzmetkerleri mınadan tazartý jumystary júrgizilmegen aýmaqta mınadan jaraqat alǵan. 59 jastaǵy Alyshan Safarov pen 57 jastaǵy Fatg Safarov túrli dárejedegi jaraqat aldy. Zardap shekken er adamdar aýrýhanaǵa jetkizilip, dárigerlerdiń baqylaýyna alyndy. Olardyń №42 jol-paıdalaný basqarmasynyń qyzmetkerleri ekendigi anyqtaldy. Qazirgi tańda jaýaptv organdar tergeý júrgizip jatyr.

Aıta keteıik, bir aı buryn - 18 qańtarda Ázerbaıjannyń Geranboı aýdany Tapgaragoıýnlý aýylynda aýyl turǵyny mınaǵa jarylyp, saldarynan onyń sol aıaǵy tizeden tómen ampýtatsııa jasaldy.