Ázerbaıjanda 5 sáýirden bastap azamattardyń qozǵalysyna shekteý qoıylady

BAKÝ. QazAqparat – Ázerbaıjan Respýblıkasynyń úkimeti janyndaǵy Jedel shtab COVID-19 koronavırýsy taralýynyń aldyn alý maqsatynda elde 5 sáýir saǵat 00:00-den bastap 20 sáýir saǵat 00:00-ge deıin qozǵalysty shekteý týraly sheshim qabyldady, dep habarlaıdy QazAqparat tilshisi.

Osy ýaqyt aralyǵynda memlekettik qyzmetshilerge, birqatar vedomstvolardyń, kásiporyndar men obektilerdiń qyzmetkerleri men ókilderine qyzmettik kýálikterin nemese jumys ornynan anyqtamasyn kórsetý negizinde júrýge ruqsat beriledi.

Sonymen qatar sol ýaqytta jeke tulǵalardyń qozǵalysyna ruqsat etiledi, jumys berýshi derekterdi elektrondy qoltańbany qoldana otyryp icaze.e-gov.az portalyna engizedi.

Basqa adamdar shuǵyl medıtsınalyq kómek qajet bolsa jáne kestege sáıkes em alýy úshin; azyq-túlik jáne basqa da kúndelikti taýarlardy, sondaı-aq dári-dármekterdi satyp alý úshin, bank jáne poshta baılanysy qyzmetterin paıdalaný; jaqyn týysynyń jerleý rásimine qatysý úshin turǵylyqty jerinen shyǵa alady.

Bul rette turǵylyqty jerinen ketýge ruqsat alý úshin azamattar úsh ındekstiń birin jáne jeke basyn kýálandyratyn derekterdi engize otyryp, 8103 nómirine SMS-habarlama joldaýlary tıis.

Foto: www.meydan.tv