Ázerbaıjan túrmelerindegi qart adamdar raqymshylyqqa ilindi

BAKÝ. QazAqparat— Búgin Ázerbaıjan prezıdentiniń 6 sáýirdegi «Tutqyndalǵan adamdarǵa raqymshylyq jasaý týraly» buıryǵyna sáıkes sottalǵan azamattar túrmeden bosatylyp jatyr. Jalpy tizimde 65 jastan asqan 176 adam bar, dep habarlaıdy QazAqparat tilshisi.

Memleket basshysynyń resmı saıtynda jarııalanǵan qujatta álemde koronavırýs ınfektsııasynyń taraǵanyna baılanysty densaýlyǵy men jasyn eskere otyryp erekshe kútimdi qajet etetin 65 jastan asqan azamattardy bosatý týraly sheshim qabyldanǵany aıtylǵan. Sheshim shyǵarý barysynda olardyń densaýlyǵy, jazasyn óteý kezindegi tártibi negizge alynǵan.

Jalpy 176 adam bostandyqqa shyǵady. Olardyń ekeýi ómir boıyna sottalǵan azamat (biri 20 jylyn, ekinshisi 25 jylyn ótegen), jol-kólik oqıǵasyna qatysty qylmys jasaǵan 25 adam bar.

Sondaı-aq, bul tizimge taratylǵan Ulttyq qaýipsizdik mınıstrligi Energetıka jáne kólik qaýipsizdigi bas basqarmasynyń burynǵy bastyǵy general-maıor Akıf Chovdarov, Transulttyq ekonomıkalyq qylmyspen kúres basqarmasynyń eks-bastyǵy general-maıor Sýbahır Gýrbanov jáne Ázerbaıjan Islam partııasynyń atqarýshysy Faramaz Abbasov ilingen.