Ázerbaıjan turǵyny klasterlik bombaǵa uryndy

BAKÝ. QazAqparat - 12 shildede Ázerbaıjandaǵy Fızýlı oblysynyń azat etilgen aýmaǵynda klasterlik bomba jarylyp, saldarynan bir adam jaraqat aldy, dep habarlaıdy QazAqparattyń menshikti tilshisi.

Aýdandyq prokýratýranyń málimetinshe, Körpü-Bina-Construction (Most-Bıldıng-Stroı) seriktestiginiń júrgizýshisi, Evlah aýdanynyń turǵyny, 1987 j.t. Garahanbeıli aýyly aýmaǵyndaǵy Halılov Elshan Eıvaz oǵly klasterlik bombaǵa uryndy. Oq-dáriniń jarylýy saldarynan Halılov ártúrli dárejedegi dene jaraqattaryn aldy. Dárigerler zardap shekken Elshan Halılovtyń ómirin saqtap qaldy. Oǵan shuǵyl kómek kórsetilgen. Keýde qýysynyń sol jaq bóliginde kóptegen synyqtary bar patsıent Bakýge evakýatsııalanatyn bolady.

Qazirgi ýaqytta Fızýlı aýdandyq prokýratýrasynda osy fakt boıynsha tergeý júrgizilip jatyr, qylmystyq is qozǵaldy.

Aıta ketý kerek, buǵan deıin Ázerbaıjandaǵy Fızýlı oblysynyń turǵyndary, Qarabaqqa kelýge tyıym salýdy buzǵan Nýrý Nýrýev pen Elnýr Gashımov 8 shildede mınaǵa urynyp, aýyr jaraqat alǵan bolatyn. Keıinnen Nýrıev qaıtys boldy, al Gashımov eki aıaǵynan aıyryldy. Ázerbaıjan Bas prokýratýrasynyń málimeti boıynsha, 2020 jyldyń 10 qarashasynan bastap Qarabahta áskerı qımyldar toqtaǵannan soń búgingi kúnge deıin 29 ázerbaıjan azamaty, onyń ishinde jeti áskerı adam mına jarylysynan qaza tapty. 86 sarbaz jáne 32 beıbit turǵyn jaralandy.