Ázerbaıjan Syrtqy ister mınıstrligi Kanada premer-mınıstriniń málimdemesin aıyptady

<p>ASTANA. KAZINFORM &ndash; Ázerbaıjan Syrtqy ister mınıstrligi Kanada Syrtqy ister mınıstri Melanı Djolıdiń 22 qyrkúıekte jasaǵan Qarabaq týraly málimdemesin aıyptap, tolyǵymen joqqa shyǵardy. Bul týraly mınıstrliktiń baspasóz hatshysy Aıhan Gadjızade jarııalaǵan jaýapta aıtylǵan.</p>

Málimdemede resmı ókil kanadalyq mınıstrdi armıan-ázerbaıjan qaqtyǵysyna qatysty faktilerdi burmalaǵany úshin synǵa aldy.

«Armenııa men Ázerbaıjan arasyndaǵy shıelenis tórt jyl buryn halyqaralyq quqyq normalary men qaǵıdattary negizinde aıaqtaldy. Ázerbaıjan 2023 jyly Qarabaq aımaǵyndaǵy egemendigin tolyǵymen qalpyna keltirip, Armenııa qarýly kúshteriniń zańsyz qatysýyn toqtatty», - dep jazdy Gadjızade.

BAQ habarlaýynsha, Kanada syrtqy ister mınıstri Melanı Djolı 22 qyrkúıekte jasaǵan málimdemesinde Qarabaqtaǵy jaǵdaıǵa toqtalǵan. Ol Ázerbaıjannyń aımaqtaǵy áskerı operatsııasynyń bir jyldyǵyn atap ótip, 100 myńnan astam beıbit turǵynnyń, onyń ishinde 30 myń balanyń jer aýdarylǵanyn jáne gýmanıtarlyq qajettilikterdiń artqanyn dálel etti. Djolı Ázerbaıjannyń áskerı áreketteri men Lachın dálizine gýmanıtarlyq júkterdiń qorshaýyn synǵa alyp, Armenııa men Ázerbaıjan arasynda konstrýktıvti kelissózder júrgizýge jáne jan-jaqty bitimgershilik kelisimge kelýge shaqyrdy.

«Kanadanyń bizdiń aımaqta beıbitshilik pen qaýipsizdikti qalaı ornatý kerektigi týraly aıtýǵa moraldyq quqyǵy joq. Mundaı arandatýshylyq jáne negizsiz málimdemeler halyqaralyq quqyq qaǵıdattaryn qurmetteýge negizdelgen aımaqtyń bolashaq damýy men ilgerileýine kedergi jasaýdan basqa eshteńe emes», - dep qosty mınıstrlik ókili.

Buǵan deıin Baký amerıkalyq kongressmenderdi Ázerbaıjan týraly faktilerdi burmalady dep aıyptaǵan bolatyn. Syrtqy ister mınıstrligi AQSh Kongresindegi keıbir toptardyń Ázerbaıjandaǵy jaǵdaıdy ashyq túrde burmalap, adam quqyqtaryn búrkenip, eldiń egemendigi men aýmaqtyq tutastyǵyna qurmetsizdik tanytqanyn atap ótti.

Buǵan qosa, Ázerbaıjan SІM Nıderlandtyń 13 qyrkúıekte jarııalanǵan syrtqy saıası baǵdarlamasyn synǵa aldy, onda Ázerbaıjan men Armenııa arasyndaǵy 44 kúndik soǵys «Taýly Qarabaqty basyp alý» retinde dep sıpattalǵan.

Ázerbaıjan SІM sondaı-aq Frantsııa syrtqy saıası vedomstvosynyń osy eldiń azamattaryn Ońtústik Kavkaz respýblıkasyna barýdan bas tartýǵa shaqyrǵan málimdemesin aıyptady.