Ázerbaıjan men Armenııa bir-birin oq atty dep aıyptady
Ázerbaıjan Respýblıkasy Qorǵanys mınıstrliginiń málimetinshe, qarýly kúshterdiń Nahchyvan baǵytyndaǵy pozıtsııalaryna oq jaýdyryldy.
«1 sáýir kúni saǵat 22:00-den 22:20-ǵa deıin Armenııa qarýly kúshteriniń Develı aýdanynyń Arazdeıen jáne Garakılse aýdanynyń Saıbaly eldi mekenderi baǵytyndaǵy bólimsheleri pozıtsııalarynan Ázerbaıjan armııasynyń Sadarak aýdanyndaǵy Geıdarabad jáne Nahchyvan avtonomııalyq respýblıkasy Shahbýz aýdanynyń Bıchenek eldi mekenderi baǵytynda oq atyldy», - delingen habarlamada.
Armenııa tarapy Ázerbaıjan Qorǵanys mınıstrliginiń habarlaryn joqqa shyǵardy.
«Ázerbaıjan Qorǵanys mınıstrliginiń 1 sáýir kúni saǵat 22:00-den 22:10-ǵa deıin Armenııa qarýly kúshteriniń bólimsheleri shekaralyq aımaqtyń ońtústik-batys bóliginde ornalasqan Ázerbaıjan pozıtsııalaryna oq jaýdyrdy degen aqparat shyndyqqa janaspaıdy.
Sonymen birge, Ázerbaıjan Qarýly Kúshteriniń bólimsheleri 1 sáýirde saǵat 22:00-de Kýt aýyly (Gegarkýnık oblysy) aýdanynda jáne 2 sáýirde saǵat 00:40-ta Teh aýyly (Sıýnık oblysy) aýdanynda armıan pozıtsııalaryna oq jaýdyrǵanyn habarlaımyz», - delingen Armenııa QM málimdemesinde.
Eske sala ketsek, 31 naýryzda Ázerbaıjan Qorǵanys mınıstrligi shuǵyl habarlama taratyp, onda Armenııa-Ázerbaıjan shartty shekarasynyń ártúrli baǵyttarynda áskerı belsendiliktiń artqany týraly shuǵyl habarlama taratty. Habarlamada Armenııa tarapy artıllerııalyq júıeler men basqa da shabýyl qarýlary úshin temirbeton bekinisterin ornatyp jatqany atap ótildi.
Buǵan deıin 17 aqpanda Ázerbaıjan prezıdenti Ilham Álıev pen Armenııa premer-mınıstri Nıkol Pashınıan Mıýnhende ótken kezdesýde eki el arasyndaǵy beıbit kelisim boıynsha jumysty jalǵastyrýǵa kelisti.