Ázerbaıjan manaty qunsyzdandy

BAKÝ. QazAqparat - Ázerbaıjan Ortalyq banki (ÁOB) 2015 jylǵy 21 jeltoqsannan bastap manattyń qubylmaly baǵamyna kóshti.

Bul týraly Ázerbaıjan Ortalyq banktiń málimdemesinde aıtyldy.

Manatqa qatysty dollar baǵamy 47, 63 paıyzǵa (0,501 manat) artyp, 1,5500 manatty qurady. 21 jeltoqsanda ázerbaıjandyq manatqa qatynasy boıynsha AQSh dollary men eýronyń resmı baǵamy 1,5500 jáne 1,6850 manat deńgeıinde belgilendi.

Eýro da 47,88 paıyzǵa (0,5456 manat) qymbattady jáne 1,6850 manatty qurady.

Reseı rýbli de 47,3 paıyzǵa (0,007 manat) qymbattap, 0,0218 manatty qurady.

Málimdemede jahandyq ekonomıkadaǵy kúrdeli jaǵdaılar, jetekshi ortalyq bankterdiń sońǵy sheshimderi, álemdik energııa tasyǵysh naryqtardaǵy usynystyń artýy, ekonomıkasy kúshti, jetekshi munaı tutynýshylar bolyp tabylatyn birqatar damýshy elderdiń ekonomıkalyq damý qarqynynyń báseńdeýi jaıly aıtylady.

Sondaı-aq 2014 jylǵy maýsymnan bastap munaı baǵasynyń úsh ese túsýine ákelgen basqa da jahandyq faktorlar kórsetilgen.