Ázerbaıjan koronavırýsqa qarsy taǵy 5 mln vaktsına aldy

BAKÝ. QazAqparat - Ázerbaıjanǵa koronavırýsqa qarsy taǵy 5 mln vaktsına jetkizý josparlanyp otyr. Bul týraly ÁR densaýlyq saqtaý boıynsha parlamenttik komıtetiniń tóraǵasy Ahlıman Amırslanov málim etti, dep habarlaıdy QazAqparat tilshisi.

«Ár adam vaktsınatsııa mańyzy týraly habardarlyqty kóterýge belsendi qatysýy kerek. Qazir 40 jastan asqan azamattar ekpe alýda. 40 jastan kishi azamattardy vaktsınalaý jaqyn arada bastalady», - dedi A. Amırslanov parlament otyrysynda.

Sondaı-aq el parlamentinde vaktsınatsııany mindetti etý usynysy aıtyldy.

Budan bólek, Ázerbaıjan Syrtqy ister mınıstrliginiń málimetine sáıkes, eldiń Densaýlyq saqtaý mınıstrliginde Qytaımen kelisimge qol qoıý sharasy ótti. Oǵan sáıkes, Qytaı Ázerbaıjanǵa 150 myń doza vaktsınany tegin jiberedi.

Jalpy búgingi kúni Ázerbaıjan azamattary COVID-19-dan 1,4 doza vaktsına aldy, bul – halyqtyń 14%. Birinshi dozasyn 1 mıllıon adam alsa, ekinshi komponentin 500 myń ázerbaıjandyq ektirdi.

Eske sala keteıik, Ázerbaıjanda vaktsınalaý 18 qańtarda bastaldy. Ázerbaıjan – túrli óndiristegi vaktsınalardy alýǵa múmkindik beretin Dúnıejúzilik densaýlyq saqtaý uıymynyń COVAX baǵdarlamasynyń múshesi. Elde 1 shildege deıin ózgeshe karantındik rejım ornatylǵan.