Ázerbaıjan kóktem merekesi - Naýryzdy toılaýda (FOTO)
Jyldaǵydaı Naýryzdy merekeleýge Ázerbaıjan prezıdenti Ilham Álıev pen onyń jubaıy Mehrıban Álıeva qatysty.
Icherısheher (Ázerbaıjan astanasyndaǵy tarıhı-arhıtektýralyq nysandar ornalasqan kóne aýdan) qorǵany qabyrǵalary men alańdary ejelgi tarıhty beıneleıtin qalqan men qylysh asynǵan áskermen bezendirildi.
Qorqyt ata Naýryz merekesi ázerbaıjan halqyna baqyt pen molshylyq ákelsin degen aq batasyn berdi.
Alańda balalar ulttyq bı bılep, án shyrqap, óner kórsetip, kórermenge merekelik kóńil-kúı syılady.
Naýryz merekesi týrızm jáne sport mınıstrligi, «Ázerbaıjan teleradıo habar taratý» JAQ uıymdastyrýymen Baký qalasy atqarýshy bıliktiń ulttyq saıabaǵynda kontserttik baǵdarlamamen jalǵasty.
Qala turǵyndary men el astanasynyń qonaqtary tanymal óner sheberleriniń oryndaýynda ánder tyńdap, myń buralǵan bıshilerdiń tamasha ónerlerin tamashalady.
Merekelik shara otshashýmen aıaqtaldy.