Ázerbaıjan Qazaqstannyń munaı sektoryna ınvestıtsııa salýǵa daıyn

<p>ASTANA. KAZINFORM - Bul týraly Qazaqstannyń Ázerbaıjandaǵy Elshisi Álim Baıel men Ázerbaıjan Respýblıkasynyń Memlekettik munaı kompanııasynyń (SOCAR) Prezıdenti Rovshan Nadjaftyń kezdesýinde aıtyldy.</p>

Kezdesý barysynda Álim Baıel Qazaqstan men Ázerbaıjan arasyndaǵy qarym-qatynastyń barlyq salada, sonyń ishinde munaı salasynda da tabysty damyp kele jatqanyn atap ótti.

2023 jyly Qazaqstan munaıy Ázerbaıjan aýmaǵy arqyly Baký-Tbılısı-Djeıhan qubyrymen tasymaldana bastady. 2023 jyly Aqtaý portynan Ázerbaıjanǵa 1057 myń tonna qazaqstandyq munaı jónetildi. 2024 jyldyń qańtar-sáýir aralyǵynda bul kórsetkish 490 myń tonnany qurady.

2024 jylǵy naýryz aıynda Qazaqstan Prezıdenti Qasym-Jomart Toqaevtyń Ázerbaıjanǵa memlekettik sapary aıasynda «QazMunaıGaz» ben SOCAR arasynda Ázerbaıjan Respýblıkasynyń aýmaǵy arqyly qazaqstandyq munaı tranzıtiniń kólemin kezeń-kezeńimen ulǵaıtý týraly kelisimge jáne qazaqstandyq munaıdy satyp alý-satý salasyndaǵy strategııalyq yntymaqtastyq týraly memorandýmǵa qol qoıyldy.

Qazirgi ýaqytta taraptar kólemdi odan ári ulǵaıtý múmkindikterin qarastyrýda. Qazaqstan Ázerbaıjannyń Baký-Sýpsa munaı qubyryn paıdalaný týraly usynysyn da zerdeleýde. Bul baǵyttaǵy tasymaldaý kommertsııalyq sharttarǵa baılanysty bolady.

Rovshan Nadjaf baýyrlas Ázerbaıjan men Qazaqstan arasyndaǵy erekshe qarym-qatynasty atap ótti. Ulttyq munaı-gaz kompanııalary arasyndaǵy ózara is-qımyldyń tabysty damyp kele jatqanyna nazar aýdardy.

Kezdesýde munaı-gaz salasyndaǵy yntymaqtastyqty odan ári damytý perspektıvalary týraly pikir almasý boldy. Atap aıtqanda, Ázerbaıjan tarapy qazaqstandyq munaı ken oryndaryna qyzyǵýshylyq tanytyp, Qazaqstanǵa bul baǵyt boıynsha ınvestıtsııa salý múmkindikterin qarastyrýda.