Ázerbaıjan Qazaqstanǵa sharap eksporttaıdy
21:43, 24 Shilde 2018
BAKÝ. QazAqparat - Ázerbaıjan 2018 jyldyń sońyna deıin Qazaqstanǵa sharap eksporttaýdy bastamaq, dep habarlaıdy Trend Ázerbaıjan sharap eksporttaýshylary men óndirýshileri qaýymdastyǵynyń tóraǵasy Elchın Madatovqa silteme jasap.
«2018 jyldyń sońyna deıin Qazaqstanǵa sharap eksporttaýdy bastamaqshymyz. Sondaı-aq, Baltyq mańy elderine, Ýkraına jáne Belarýsqa eksportty keńeıtý josparda bar. Olar Ázerbaıjan sharabyn ótkizý úshin áleýetti iri naryq bolyp tabylady», - dedi E. Madatov.
E. Madatovtyń aıtýynsha, sharapty óndiretin jáne eksporttaıtyn kompanııalar jańa tehnologııalardy udaıy satyp alýda. Aldaǵy eki aıda Ázerbaıjanda sharap óndiretin jańa kásiporyndar ashý josparlanyp jatyr.
Aıta keteıik, 2018-2025 jyldary Sharap óndirisin damytý memlekettik baǵdarlamasyna sáıkes bul el 2025 jylǵa deıin eksportty bes esege arttyrýdy josparlaýda.