Ázerbaıjan Qazaqstan Prezıdentiniń bastamasyn qoldaıdy
Qazaqstandyq dıplomat ekijaqty qarym-qatynastyń joǵary deńgeıi men dınamıkasyn atap ótti. Elshi emdik týrızm maqsatynda Ázerbaıjanǵa keletin qazaqstandyqtar sanynyń jyl saıyn artyp kele jatqanyna, Ázerbaıjan azamattarynyń Qazaqstannyń medıtsınalyq oqý oryndarynda tabysty bilim alyp jatqanyna nazar aýdardy.
Ázerbaıjandyq mınıstr eki el arasynda densaýlyq saqtaý salasyndaǵy qatynastardy damytý úshin úlken áleýettiń bar ekendigin atap ótti. Teımýr Mýsaev elderimiz dári-dármekterdi óndirý boıynsha birlesip jumys isteı alar edi degen pikirin aıtty. Sonymen qatar mınıstr medıtsınalyq mekemelerdi akkredıtatsııalaý jáne sapasyn baqylaý salasyndaǵy qazaqstandyq tabysty tájirıbeni zerdeleýge jáne Ázerbaıjanda engizýge qyzyǵýshylyq bildirdi.
Elshi Álim Baıel qazaqstandyq kompanııalardyń Ázerbaıjanda, onyń ishinde Qarabaqta medıtsınalyq nysandardyń qurylysyna atsalysýǵa daıyn ekenin málimdedi. Mınıstr bul bastamany oń qabyldap, osy baǵytta yntymaqtastyq jasaýǵa daıyn ekenin jetkizdi.
Kezdesý barysynda Teımýr Musaev Ázerbaıjannyń Qazaqstan Prezıdenti Qasym-Jomart Toqaev usynǵan alǵashqy medıtsınalyq-sanıtarlyq kómek jónindegi elder koalıtsııasyn qurý týraly bastamany qoldaıtynyn atap ótti. Medıtsına salasyn halyqarylyq deńgeıde damytýǵa baǵyttalǵan bul bastamany Memleket basshysy 2023 jylǵy 23 qazanda ótken Almaty deklaratsııasynyń 45 jyldyǵyna jáne Astana deklaratsııasynyń 5 jyldyǵyna arnalǵan jahandyq konferentsııa barysynda usynǵan bolatyn.