Ázerbaıjan Kaspıı teńizinde jańa uńǵymalardy iske qosty

ASTANA. QazAqparat - Ázerbaıjannyń SOCAR memlekettik munaı kompanııasy Kaspıı teńizindegi "Munaı tastary" ken ornynda jańa uńǵymalardy iske qosty. Endi kompanııa jyl saıyn qosymsha 3,65 myńnan astam tonna munaı óndiretin bolady, dep habarlaıdy QazAqparat «Ttrend.az» agenttigine silteme jasap.

Ulttyq kompanııanyń taratqan baspasóz málimdemesine sáıkes, SOCAR 2017 jyldyń qańtar-shildesinde eldiń ofshorly jáne onshorly ken oryndarynan 4,34 mln tonna munaı óndirgen. 2016 jyldyń sáıkes kezeńinde bul kórsetkish 4,42 mln tonna bolǵan. Al 2016 jyly kompanııa eldiń ofshorly jáne onshorly ken oryndarynan 7,52 mln tonna qara altyn óndirgen, 2015 jyly - 8,16 mln tonna.

Jalpy Ázerbaıjanda ótken jyly 41,03 mln tonna munaı óndirildi, 2015 jyly - 41,58 mln tonna.