Ázerbaıjan Irannan Reseıge konteınerlik poıyz jibermekshi

<p>ASTANA. KAZINFORM &ndash; Ázerbaıjan Astara (Iran) &ndash; Baký (Ázerbaıjan) &ndash; Astrahan (Reseı) baǵytyndaǵy konteınerlik poıyzdy iske qosý múmkindigin qarastyryp jatyr. Bul týraly Astrahan oblysynyń Syrtqy ister mınıstrligi habarlady, dep jazady TASS.</p>

Vedomstvonyń habarlaýynsha, Ázerbaıjan men Astrahan oblysy arasyndaǵy negizgi júk aǵyny temirjol arqyly jáne Soltústik-Ońtústik Halyqaralyq kólik dáliziniń (HTK) batys tarmaǵymen ótedi. Logıstıkalyq baǵyt Reseıge Ázerbaıjan taýarlaryn, sondaı-aq Iran, Túrkııa jáne Úndistannyń tranzıttik júkterin jetkizedi.

— Búginde Ázerbaıjan tarapy Kýtým stansasynda ornalasqan Astrahan temirjol toraby ınfraqurylymyn paıdalana otyryp, «Astara — Baký — Astrahan» baǵyty boıynsha konteınerlik poıyzdy iske qosý múmkindigin qarastyryp jatyr, — dep atap ótti mınıstrlik.

Sarapshylardyń pikirinshe, Ázerbaıjan men Reseı de Soltústik-Ońtústik HTK-nyń transkaspıılik ýchaskesi arqyly júk aǵynyn ulǵaıtý boıynsha belsendi jumys júrgizilip jatyr.

Reseı tarapy Kaspıı klasteri obektilerin, atap aıtqanda port ınfraqurylymy men konteınerlik habty paıdalanýǵa berýmen Ázerbaıjanmen teńiz júk qatynasynyń ózektiligi artatynyn kútedi.

Buǵan deıin ázerbaıjandyq BAQ qyrkúıektiń sońynda «Orta Edil-Kaspıı teńizi-Parsy shyǵanaǵy» logıstıkalyq jobasynyń batys temirjol dálizi boıymen Ýlıanovsk-Baký-Astara tikeleı júk blogy poıyzy iske qosylatynyn habarlaǵan. Bul baǵyt boıynsha jylyna 200 myń tonnaǵa deıin eksporttyq-ımporttyq júk tasymaldanady dep josparlanǵan.