Ázerbaıjan Irandaǵy elshiligi qyzmetkerlerin evakýatsııalaýdy aıaqtaýǵa jaqyn

ASTANA. QazAqparat – Tegerandaǵy dıplomatııalyq mekemege jasalǵan qarýly shabýyldan keıin Ázerbaıjan Irandaǵy elshiligi qyzmetkerlerin evakýatsııalaý sharalaryna kirisken bolatyn. Eldiń syrty ister mınıstrligi baspasóz qyzmetiniń basshysy Aıhan Gadjızade evakýatsııalaý aıaqtalyp qalǵanyn málim etti, dep habarlaıdy QazAqparat haqqin.az-ǵa silteme jasap.

Aıhan Gadjızade atap ótkendeı, búgin elshilik qyzmetkerleri men olardyń otbasylary múshelerin, sondaı-aq qaıtys bolǵan Orhan Askerovtiń denesin elge jetkizý josparlanyp otyr. Marqumnyń denesin Ázerbaıjanǵa jetkizý maqsatynda shyǵarylǵan ushaq Tegeran áýejaıynda turǵany aıtylady.

Eske salsaq, Irandaǵy Ázerbaıjan elshiliginde 27 qańtar kúni tańerteń atys bolyp, dıplomatııa ókildiginiń kúzet basshysy qaza tapty, al onyń eki áriptesi jaraqat aldy.

Irannyń Syrtqy ister mınıstri Hoseın Amır Abdollahııan málim etkendeı, Irannyń arnaıy qyzmeti men qaýipsizdik qyzmeti «bul – terrorlyq áreket nemese uıymdasqan qylmys emes, jeke adam tarapynan jasalǵan qastandyq» degen qorytyndyǵa kelgen.

Alaıda, Baký bul oqıǵa «jeke nemese otbasylyq sebepterden boldy» degenge kelispeıdi.

«Biz bul shabýyldy aıyptaımyz jáne Iran úkimetinen arandatýshylardy anyqtaýǵa qajetti sharalar qabyldaýdy talap etemiz. Iran tarapy bizdiń elshilikke shabýyl jasalmaýyn qamtamasyz etýi kerek edi. Tegeran Irandaǵy Ázerbaıjanǵa qarsy naýqanǵa baılanysty tıisti sharalar qabyldaýy tıis. Keıingi aılarda ırandyq BAQ-ta Ázerbaıjanǵa qarsy aýqymdy nasıhat júrip jatyr, bul osy shabýylǵa ıtermelegen bolýy múmkin. Ázerbaıjan qashanda Iranmen tatý kórshilikti qoldaıtyn, biraq mynadaı arandatýshylyqtar jaǵymsyz áser etedi», - degen bolatyn Ázerbaıjan syrty ister mınıstrligi baspasóz qyzmetiniń basshysy Aıhan Gadjızade.

Aıta ketsek, QR Syrtqy ister mınıstrligi Irandaǵy Ázerbaıjan elshiligine jasalǵan shabýyldy qatań aıyptady.