Ázerbaıjan elshiliginiń ókilderi jumys saparymen Aqmola oblysynda boldy
Kezdesýde oblys ákiminiń orynbasary Aqmola oblysynyń ekonomıkalyq-áleýmettik damý barysy, el ordasy Astana qalasynyń irgesinde ornalasqandyqtan, ózindik erekshelikteri týraly aıtyp ótti.
«Bul artyqshylyq eń aldymen jaýapkershilik, -dedi Nurlan Núrkenov. Respýblıkadaǵy astyqty kóp óndiretin úsh oblystyń biri - bizdiń oblys. Jalǵyz agrarlyq oblys qana emespiz, sońǵy jyldary ónerkásiptik-agrarlyq óńirge aınalyp otyrmyz. Oblys kásiporyndary jyl basynan beri 350 mıllıard teńgeniń ónimderin óndirdi. Bir aıta keterligi, buryn eskerilmegen salalar damyp, óz ónimderin de óndirýde. Aqmolalyq dıqandar bıylǵy jyly 5,7 mıllıon tonna astyq jınap aldy. Onyń 70 paıyzǵa jýyǵy úshinshi ulasty. Óndirilgen astyqtyń deni eksportqa shyǵarylady. Sizder bizdiń elimizdegi eń ulyq merekelerdiń biri - el táýelsizdiginiń 25 jyldyǵy qarsańynda qasıetti Kókshetaý men Qaraótkeldiń topyraǵyn basyp, ystyq qushaqtaryńyzdy jaıyp, yqylastaryńyzdy tanytyp kelip otyrsyzdar. Sondyqtan, oblys ákimi atynan qosh keldińizder degen yqylasymyzdy jetkize otyryp, eki eldiń arasyndaǵy ekonomıkalyq, mádenı, rýhanı baılanystarymyzdy damytýǵa yntaly ekendigimizdi bildirgim keledi.
Munan soń Qazaqstan Respýblıkasyndaǵy Ázerbaıjan elshiliginiń keńesshisi Agadjavıd Ramazanov sóz alyp, sapar maqsatyn, aldaryna qoıǵan mindet-murattaryn aıtyp berdi.
«Árıne, kez-kelgen sapardyń ekonomıkalyq sıpaty bolatyndyǵy ras. Biraq, túptep kelgende bizdiń oıymyz bul ólkede taýarymyzdy satyp, paıda taba qoıaıyq degendik emes, túbin qýyp kelgende týysqan bolyp shyǵatyn aǵaıyndy eki eldiń arasyndaǵy syılastyq sezimdi arttyra túsý. Eń aldymen, sizderdegi Qazaqstan halqy Assambleıasy týraly ystyq yqylaspen aıtýǵa bolar edi».
«Durys aıtasyz,-dedi Nurlan Nurkenov, - bul uıym el Prezıdenti Nursultan Nazarbaevtyń bastamasymen qurylǵan. Qazirgi kúni Aqmola oblysynda júzden astam ult ókilderi aralarynan qyl ótpeıtin dostyq qarym-qatynasta, tatý-tátti tirshilik quryp jatyr. Oblys ortalyǵyndaǵy Dostyq úıinde birneshe ulttyń tili oqytylyp, óneri men mádenıeti úıretiledi. Árbir ulttyń óz tarıhyn, ulttyq ereksheligin jete bilýine barlyq jaǵdaıdy týǵyzyp otyrmyz».
Agadjavıd Ramazanov ta bizdiń oblysta óz qandastarynyń kóptep turatyndyǵyn, olardyń baqýatty tirshiligi, rýhanı baılyǵy týraly biletindigin aıtyp ótti. Sóz arasynda barlyq ulttarǵa birdeı shapaǵat-sharapatyn tógip, jaǵdaıyn jasap otyrǵan barsha qazaqstandyqtarǵa shynaıy alǵysyn bildirdi. Ázerbaıjan Іshki ister mınıstrliginiń ókili Nasımı Shıkarov ta sóz alyp, eki eldiń de tabıǵatynan aıryqsha qonaqjaı ekendigine toqtaldy. El ishindegi turaqtylyqqa, aýyzbirlikke alǵys-lebizin aıta kelip, keler kúnderdiń kókjıeginde de dál osyndaı úrdisten jańylmaýdy tiledi.
Al, óńirlik kásipkerler palatasynda ótken kezdesýde aqmolalyqtardyń ázerbaıjandarmen saýda-ekonomıkalyq qarym-qatynasy sóz boldy. Osy retti, meımandar beınerolık arqyly saýda, týrızm, logıstıka salasy boıynsha usynatyn qyzmet túrlerin aqmolalyq kásipkerlerge tanystyrdy.
«Sońǵy jyldary bizdiń elde munaı óndirisine zor kóńil bóline bastady. Osynyń arqasynda eldiń eksporttyq áleýeti artyp otyr. Sizderdiń oblystaryńyz shıkizatqa baı. Búgingi bizdiń saparymyzdyń maqsaty da osy ekijaqty saýda-sattyqty damytý bolyp tabylady», - dedi Qazaqstan Respýblıkasyndaǵy Ázerbaıjan elshiliginiń keńesshisi Agadjavıd Ramazanov.
Sonymen qatar, kezdesý barysynda Aqtaý qalasyndaǵy «Azersýn» aýyl sharýashylyǵy kesheniniń jumysy da aıtyldy. Qazaqstandyq kásipkerler Ázirbaıjan elinen ákelinetin taýarlardy osy logıstıkalyq ortalyq arqyly jetkize alady. Kez-kelgen taýarǵa qatysty kedendik rásimdeý, qabyldaý, jóneltý tárizdi sharalardy osynda júzege asyrýǵa bolady.
Jalpy, kezdesý barysynda osy máseleler, atap aıtqanda, agroónerkásiptik sektor, týrızm, jáne saýda-ekonomıkalyq múmkindikter de keńinen qarastyryldy.