Ázerbaıjan bankine salynǵan zeınetaqy qarajaty joǵalǵan joq -mınıstr

TARAZ. QazAqparat - Jambyl oblysy ákimi Asqar Myrzahmetovtiń óńirdiń áleýmettik-ekonomıkalyq damýy jónindegi esebin tyńdaý barysynda Ázerbaıjan bankine salynǵan zeınetaqy qarjylaryna qatysty másele kóterildi, dep habarlaıdy QazAqparat tilshisi.

Atalǵan jıynqa qatysqan QR Qarjy mınıstri Baqyt Sultanovqa qazaqstandyqtardyń Ázerbaıjan bankine salǵan zeınetaqy qarjylary týraly suraq qoıyldy.

«Bankpen byltyr da osyndaı jaǵdaı bolǵan. Ulttyq bank basshylarynan arnaıy top jasaqtalyp, Úkimettiń arnaýly ókilderiniń qatysýymen kelissózder júrgizildi. Halyqaralyq talaptarǵa sáıkes, bank óz mindettemelerin qaıta qurylymdaý rejımine kirdi. Alaıda biz kelisimge kele aldyq, buryn ornalastrylǵan 250 mıllıon dollar qarjy úlestirilmeıtin boldy. Ótken jyldary osy bankten 40 mıllıon dollardan astam qarajat tústi, ıaǵnı azamattardyń zeınetaqy aktıvteri osy mólsherge ulǵaıdy», - dedi QR Qarjy mınıstri.

Oblıgatsııalardyń aınalymda bolý merzimine qatysty suraqqa «Olar almastyryldy. Endi bizge Ázerbaıjannyń banki emes, eldiń ózi qaryz. Oblıgatsııalar 15 jylǵa bólindi. Bastapqy 3,5 protsentti quraıdy jáne bizdiń esebimizshe, sol 250 mıllıon dollar 15 jylda shamamen 400 mıllıon dollarǵa aınalýy tıis. ıAǵnı, zeınetaqy qorynyń qarajattary joǵalǵan joq, olar saqtaýly tur, sonymen qatar halyqaralyq mólsherlemege sáıkes kóbeıip otyrady», - dep jaýap berdi B.Sultanov.