Ázerbaıjan Armenııanyń 8 áskerı qyzmetkerin qaıtardy

BAKÝ. QazAqparat – 2022 jyldyń 7 aqpanynda Ázerbaıjan Armenııanyń segiz áskerı qyzmetkerin qaıtardy. Bul týraly QazAqparattyń menshikti tilshisi Ázerbaıjannyń áskerı tutqyndar, kepil tutqyndar jáne iz-túzsiz joǵalǵan azamattar isteri jónindegi memlekettik komıssııasynyń málimdemesine silteme jasap habarlaıdy.

«Olardyń bir bóligi – 2021 jyldyń 16 qarashasynda Kelbadjar baǵytyndaǵy memlekettik shekarada ustalǵan áskerı qyzmetkerler», - delingen habarlamada.

Ázerbaıjan bul qadamǵa jaýap retinde Armenııadan birinshi armıan-ázerbaıjan soǵysy kezinde qaza tapqan Ázerbaıjan áskerıleri men azamattary jáne olardyń kómilgen jerleri týraly aqparat kútedi.

Atap óteıik, Armenııa atalǵan mindettemeni 4 aqpan kúni Frantsııa prezıdenti Emmanýel Makron, Ázerbaıjan prezıdenti Ilham Alıev, Armenııanyń premer-mınıstri Nıkol Pashınıan, sonymen qatar Eýropalyq odaq keńesiniń basshysy Sharl Mısheldiń qatysýymen ótken beınekonferentsııa kezinde alǵan.

Avtory: Serıkbol Koshmaganbetov

Foto: 1news.az