Ázerbaıjan-Armenııa qatynasyn dıplomatııalyq jolmen retteýdi jaqtaımyz – Qasym-Jomart Toqaev

ASTANA. QazAqparat – Qazaqstan Ázerbaıjan men Armenııa arasyndaǵy ózara qatynasty dıplomatııalyq jolmen retteýdi jaqtaıdy. Bul týraly Ázerbaıjan Prezıdenti Ilham Álıevpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Búgin halyqaralyq kúntártibindegi ózekti máseleler boıynsha pikir almasý boldy. Qazaqstan men Ázerbaıjan túrli kópqyrly qurylymdar aıasynda jemisti ózara is-qımyl jasaıdy. Halyqaralyq jáne óńirlik kóptegen ózekti máseleler boıynsha uqsas ustanymdy ustanady. Osy turǵy Qazaqstan Ázerbaıjan men Armenııa arasyndaǵy ózara qarym-qatynasty dıplomatııalyq retteýdi dástúrli túrde jaqtaıdy. Sonymen qatar beıbit shartty tezirek jasasý boıynsha kúsh-jigerge qoldaý bildiredi», - dedi Qasym-Jomart Toqaev.

Sondaı-aq Memleket basshysy Ázerbaıjanmen óńirdegi turaqtylyq pen qaýipsizdikti nyǵaıtý úshin ózara qoldaý jáne birlesken is-sharalar qabyldaýdy jalǵastyrý qajettigine qatysty ortaq túsinik bar ekendigin basa aıtty.

«Qazaqstan úshin Ázerbaıjanmen yntymaqtastyq basymdyq boldy jáne bola da beredi», - dedi Prezıdent.